Three In One Chandran : గిటార్, పియానో, మౌత్ ఆర్గాన్.. ఇలా మూడు రకాల సంగీత పరికరాల నుంచి స్వరాలు వినిపిస్తున్నా.. వాటి వెనుక ఉన్న వ్యక్తి మాత్రం ఒక్కరే. ఆయనే 'త్రీ ఇన్ వన్ చంద్రన్' అలియాస్ హిప్పీ చంద్రన్. ఊరు.. కేరళ కోజికోడ్. హార్మోనియం వాయించే సోదరుడ్ని చూసి చిన్నతనంలో సంగీతంపై మక్కువ పెంచుకున్నారు చంద్రన్. అప్పట్లో ప్రపంచాన్ని ఓ ఊపు ఊపిన హిప్పీ కల్చర్కు ఆకర్షితులై.. తన స్టైల్ మార్చుకున్నారు. అలా ఎరనీపళం వడకచ్చేరి చంద్రన్ కాస్తా హిప్పీ చంద్రన్గా మారారు.
"మా ఇంట్లో ఓ హార్మోనియం పెట్టె ఉండేది. దాన్ని మా అన్నయ్య వాయించేవారు. కొన్ని సార్లు నేను దాన్ని వాయించేటప్పుడు ఆయను చూసి నన్ను ప్రోత్సహించారు. ఏదైనా ఓ కొత్త పాట వాయించమని చెప్పేవారు. అలా నేనే సాధన చేయడం ప్రారంభించాను. అలా నా సంగీత ప్రస్థానం మొదలైంది."
- చంద్రన్, సంగీత కళాకారుడు
క్రమంగా చంద్రన్ దృష్టి గిటార్ వైపు మళ్లింది. గిటార్ వాయించడమే కాక.. తయారు చేయడం ఎలానో ఓ విదేశీయుని వద్ద నేర్చుకున్నారు. "దానీ మోంగ్ అనే వ్యక్తి గిటార్ వాయించడమే కాకుండా వాటిని తయారు చేసేవాడు. ఓ రోజు నేను ఆయన్ను కలిసినప్పుడు నాకు ఈ విషయం చెప్పారు. తర్వాత నేను కూడా ఎంతో ఆసక్తిగా గిటార్ వాయించడం నేర్చుకున్నా. కానీ అది ప్లే చేస్తున్న సమయంలో చాలా నొప్పిగా ఉండేది. అలా 'కాంచీరే కాంచీరే' అనే హిందీ పాటకి కార్డ్స్ నేర్చుకుని దాన్ని వాయించాను. తర్వాత లోహీ స్పోర్ట్స్ అనే షాప్లో ఓ సెకండ్ హ్యాండ్ గిటార్ కొనుక్కుని సాధన చేయడం ప్రారంభించాను" అని చెప్పారు చంద్రన్.
ఆ తర్వాత కొజికోడ్లోని కొన్ని స్టార్ హోటళ్లలో రెగ్యులర్గా షోలు చేసేవారు చంద్రన్. ఎన్నో మ్యూజికల్ గ్రూప్స్కు లీడ్ గిటారిస్ట్గానూ పనిచేశారు. ఓ సన్నిహితుడి సలహాతో జైపుర్లోని ఓ సర్కస్లో చేరారు చంద్రన్. గిటారిస్ట్ అయినప్పటికీ బ్యాండ్లోని మిగతా సభ్యులు లేనప్పుడు వారి వాయిద్యాలను కూడా చంద్రన్నే వాయించేవారు.
ఆ సమయంలోనే ఆయనకు ఓ ఐడియా వచ్చింది. ఒకేసారి వేర్వేరు వాయిద్యాలను వాయిస్తే ఎలా ఉంటుందో చూడాలనుకున్నారు. మొదట గిటార్తో పాటు మౌత్ ఆర్గాన్ను వాయించే సాధనాన్ని కనిపెట్టారు. ఆ తర్వాత దానికి కీబోర్డ్ను కూడా జోడించారు చంద్రన్. అలా మూడు వాయిద్యాలను అవలీలగా వాయిస్తూ హిప్పీ చంద్రన్ కాస్తా 'త్రీ ఇన్ వన్ చంద్రన్'గా మారారు. అనేక రాష్ట్రాల్లో ప్రదర్శనలు ఇచ్చారు. ఒకప్పుడు మలయాళం మాత్రమే వచ్చిన చంద్రన్ ఇప్పుడు అనేక భాషలను అవలీలగా మాట్లాడుతున్నారు.
ఇదీ చదవండి: యువతకు మోదీ 'దీపావళి' గిఫ్ట్.. 75వేల మందికి ఉద్యోగ నియామక పత్రాలు
ఐదేళ్లలో సీఎం సంపద డబుల్.. కొత్తగా రూ.కోట్ల ఆస్తి.. బంగారం ఎంత ఉందంటే?
