Bulldozer on Temples Rajgarh: దేశంలో ప్రస్తుతం బుల్డోజర్ల ట్రెండ్ నడుస్తోంది. అక్రమ నిర్మాణాలపై పలు రాష్ట్రాల్లో భాజపా ఎక్కుపెడుతున్న అస్త్రం ఇదే. తొలుత ఉత్తర్ప్రదేశ్లో మొదలైన ఈ కూల్చివేతలు క్రమంగా పలు రాష్ట్రాలకు విస్తరించాయి. ఇటీవల మధ్యప్రదేశ్ సహా దిల్లీ జహంగీర్పురీలో అక్రమ నిర్మాణాల కూల్చివేతలు వివాదాస్పదంగా మారాయి. ఈ వ్యవహారం సుప్రీంకోర్టుకు కూడా చేరింది.
ఇప్పుడు రాజస్థాన్ అల్వార్లో వందల ఏళ్ల నాటి 3 ఆలయాల్ని కూల్చివేయడం వివాదానికి దారితీసింది. సరాయి మొహల్లా ప్రాంతంలోని 300 సంవత్సరాల పురాతన శివాలయం సహా మరో రెండు ఆలయాలను బుల్డోజర్లతో కూల్చివేశారు అధికారులు. అక్కడే మరిన్ని దుకాణాలు, పలు నిర్మాణాలను కూడా ధ్వంసం చేశారు. ఈ కూల్చివేతలపై హిందూ సంఘాలు, స్థానికులు ఆగ్రహం వ్యక్తం చేశారు. దీనికి సంబంధించి రాజ్గఢ్ పోలీస్ స్టేషన్లో ఫిర్యాదు చేశారు.
ఆలయ కూల్చివేతలపై భాజపా మండిపడింది. నిజానిజాలను వెలికితీసేందుకు ఐదుగురు సభ్యులతో ఓ కమిటీని నియమిస్తున్నట్లు తెలిపారు రాజస్థాన్ భాజపా అధ్యక్షుడు డా. సతీశ్ పునియా. ఘటనా స్థలాన్ని పరిశీలించి, వాస్తవాలతో కూడిన నివేదిక తనకు అందించాలని ఆయన ఆదేశించారు. సిటీ అభివృద్ధి పనుల మాస్టర్ ప్లాన్లో భాగంగా కూల్చివేతలు చేపట్టినట్లు సమాచారం.
యథాతథ స్థితిలో విగ్రహాలు: ఆలయ కూల్చివేతలపై స్పందించిన రాజస్థాన్ కాంగ్రెస్ చీఫ్ డోటాసరా.. ఇది భాజపా హయాంలోనే మొదలైందని అన్నారు. కూల్చివేతలకు కలెక్టర్ అనుమతి తీసుకోలేదని, మున్సిపల్ బోర్డు అధ్యక్షుడి ఆదేశాల మేరకు అధికారులు నిర్ణయం తీసుకున్నారని ఆయన అన్నారు. విషయం తెలిసిన వెంటనే తమ ప్రభుత్వం బాధ్యులపై చర్యలు తీసుకుందని, విగ్రహాలను యథాతథ స్థితిలో ఉంచాలని ఆదేశాలు ఇచ్చిందని స్పష్టం చేశారు.
ఇవీ చూడండి: కోర్టు ఆవరణలో కాల్పులు - క్లయింట్ల మధ్య గొడవే కారణం
