అమెరికన్ విద్యుత్ కార్ల దిగ్గజం టెస్లా.. వచ్చే ఏడాది భారత్లో కార్యకలాపాలను ప్రారంభించనుందని కేంద్ర రోడ్లు, రవాణా శాఖ మంత్రి నితిన్ గడ్కరీ తెలిపారు. డిమాండ్ను బట్టి తయారీ యూనిట్నూ నెలకొల్పనుందని పేర్కొన్నారు. ఈ నేపథ్యంలో.. దేశంలో దిగుమతి చేసుకుంటున్న రూ.8 లక్షల కోట్ల విలువైన ముడి ఇంధన ఉత్పత్తులను తగ్గించుకోవడం సహా గ్రీన్ ఇంధనాన్ని, ఎలక్ట్రిక్ వాహనాలను ప్రోత్సహించడానికి ప్రయత్నిస్తున్నట్లు వెల్లడించారు.
"అమెరికా విద్యుత్ కార్ల దిగ్గజం టెస్లా విక్రయ కేంద్రాలను భారత్లో నెలకొల్పనుంది. డిమాండ్ను బట్టి తయారీ యూనిట్లను స్థాపించనుంది. ఇది వచ్చే ఐదేళ్లలో ప్రపంచంలోనే అతిపెద్ద విద్యుత్ వాహనాల తయారీ కేంద్రం కానుంది," అని గడ్కరీ తెలిపారు.
వాతవరణ ఒప్పందంలో భాగంగా 2030 నాటికి కార్బన్ ఉద్గారాలను 30-35 శాతానికి తగ్గించటానికి భారత్ కట్టుబడి ఉంది. దీనిలో భాగంగా రూ.8 లక్షల కోట్ల ఇంధన ఉత్పత్తుల దిగుమతులను తగ్గించుకోనుంది. వీటితో పాటు ఆకుపచ్చ ఇంధనం, ఈవీ వాహనాల పెంపుపైనా భారత్ దృష్టి సారించింది. 2030 నాటికి ఎలక్ట్రిక్ వాహనాల అమ్మకాలు ప్రైవేటు కార్లకు 30శాతం, వాణిజ్య కార్లకు 70శాతం, బస్సులకు 40శాతం, ద్విచక్ర వాహనాలకు 80శాతం చొప్పున ప్రోత్సాహకాలను అందించాలని కేంద్రం భావిస్తోంది.
- నితిన్ గడ్కరీ, కేంద్ర రోడ్లు రవాణా శాఖ మంత్రి.
ఇదీ చదవండి: 'బీఫ్ తినొద్దని చెప్పడానికి మీరెవరు ?'
