Telangana Assembly Election Results 2023 Live News : గెలుపు గుర్రాలుగా బరిలో దిగి ఓటమితో సరి - ఓడిపోయిన మంత్రుల లిస్ట్​ ఇదే

Telangana Assembly Election Results 2023 Live News : తెలంగాణ అసెంబ్లీ ఎన్నికల్లో అత్యధిక స్థానాల్లో గెలుపొందిన కాంగ్రెస్​ పార్టీ ప్రభుత్వ ఏర్పాటు దిశగా దూసుకెళ్తోంది. ఈ క్రమంలో బీఆర్​ఎస్​కు చెందిన పలువురు మంత్రులు ఓడిపోయారు. గెలుపు గుర్రాలుగా బరిలోకి దిగి, అనూహ్యంగా ఓటమి పాలయ్యారు. వారెవరో ఇప్పుడు చూద్దాం.

• " class="align-text-top noRightClick twitterSection" data="">

Telangana Assembly Election Results 2023 Live News : తెలంగాణ అసెంబ్లీ ఎన్నికల ఫలితాలు దాదాపు కొలిక్కి వచ్చాయి. అత్యధిక స్థానాల్లో విజయబావుటా ఎగురవేసిన కాంగ్రెస్​ పార్టీ అధికారం ఛేజిక్కుంచుకునే దిశగా దూసుకెళ్తుంది. అదే సమయంలో బీఆర్​ఎస్​ తరఫున గెలుపు గుర్రాలుగా బరిలోకి దిగిన పలువురు మంత్రులు అనూహ్యంగా ఓటమి పాలయ్యారు.

అల్లోల ఇంద్రకరణ్​రెడ్డి: రాష్ట్ర అటవీ, దేవాదాయ శాఖ మంత్రిగా ఉన్న అల్లోల ఇంద్రకరణ్​ రెడ్డి నిర్మల్​ నియోజకవర్గం నుంచి ఎన్నికల బరిలో దిగారు. కాంగ్రెస్ తరఫున కె.శ్రీహరి రావు, బీజేపీ అభ్యర్థిగా మహేశ్వర్​ రెడ్డి ప్రత్యర్థులుగా పోటీలో నిలిచారు. చివరకు బీజేపీ అభ్యర్థి చేతిలో మంత్రి ఓటమి పాలయ్యారు.

సింగిరెడ్డి నిరంజన్​ రెడ్డి: వనపర్తి నియోజకవర్గం నుంచి బీఆర్​ఎస్​ అభ్యర్థిగా బరిలో నిలిచిన వ్యవసాయ శాఖ మంత్రి సింగిరెడ్డి నిరంజన్​ రెడ్డి కాంగ్రెస్ అభ్యర్థి టి.మేఘారెడ్డి చేతిలో ఓడిపోయారు. ఇక్కడ బీజేపీ అభ్యర్థిగా అనూజ్ఞ రెడ్డి పోటీలో నిలిచారు.

పువ్వాడ అజయ్​ కుమార్​: రాష్ట్ర రవాణా శాఖ మంత్రి పువ్వాడ అజయ్​కుమార్​ కాంగ్రెస్​ అభ్యర్థి తుమ్మల నాగేశ్వర రావు చేతిలో ఓటమి చవిచూశారు. ఇక్కడ బీజేపీ అభ్యర్థిగా మిర్యాల రామకృష్ణ, సీపీఎం తరఫున యర్ర శ్రీకాంత్ ఎన్నికల బరిలో నిలిచారు.

ఎర్రబెల్లి దయాకర్​రావు: జనగామ​ జిల్లా పాలకుర్తి నియోజకవర్గం నుంచి పోటీ చేసిన మంత్రి ఎర్రబెల్లి దయాకర్​రావు అనూహ్యంగా ఓటమి పాలయ్యారు. కాంగ్రెస్​ తరఫున బరిలో నిలిచిన యశస్విని మామిడాల చేతిలో ఓటమి పాలయ్యారు.

శ్రీనివాస్​ గౌడ్: ఆబ్కారీ శాఖ మంత్రి శ్రీనివాస్​ గౌడ్​ ఓటమి పాలయ్యారు. మహబూబ్​నగర్​ అసెంబ్లీ నియోజకవర్గం నుంచి శ్రీనివాస్​ గౌడ్ బరిలో దిగారు. ప్రత్యర్థులుగా కాంగ్రెస్​ తరఫున యెర్రం శ్రీనివాస్​రెడ్డి, బీజేపీ తరఫున ఏపీ మిథున్​రెడ్డి బరిలో నిలిచారు.

కొప్పుల ఈశ్వర్: జగిత్యాల జిల్లా ధర్మపురి నియోజకవర్గం నుంచి ఎన్నికల బరిలో నిలిచిన మంత్రి కొప్పుల ఈశ్వర్​ కాంగ్రెస్ అభ్యర్థి అడ్లూరి లక్ష్మణ్​కుమార్​ చేతిలో ఓడిపోయారు.

ఈ ఆరుగురు మినహా మిగతా 9 మంది మంత్రులు మళ్లీ విజయబావుటా ఎగురవేశారు. గజ్వేల్​లో కేసీఆర్, సిద్దిపేటలో హరీశ్​రావు, సిరిసిల్లలో కేటీఆర్, సనత్​నగర్​లో తలసాని శ్రీనివాస్​ యాదవ్, మహేశ్వరం నుంచి సబితా ఇంద్రారెడ్డి, కరీంనగర్​ నుంచి గంగుల కమలాకర్, సూర్యాపేటలో జగదీశ్​రెడ్డి, బాల్కొండ నియోజకవర్గంలో ప్రశాంత్​ రెడ్డి, మేడ్చల్​లో చామకూర మల్లారెడ్డి గెలుపొందారు.