Summons to God: ఓ కేసు విచారణలో భాగంగా గుడిలో ప్రతిష్టించిన విగ్రహానికి సమన్లు జారీ చేసింది తమిళనాడులోని కుంభకోణం కోర్టు. న్యాయస్థానం చర్యపై ఆగ్రహం వ్యక్తం చేసిన మద్రాస్ హైకోర్టు కుంభకోణం కోర్టు ఇచ్చిన ఆదేశాలను రద్దు చేసింది. విచారణకు విగ్రహాన్ని కోర్టులో ప్రవేశపెట్టాల్సిన అవసరం లేదని స్పష్టం చేసింది.
ఇదీ జరిగింది..
తిరుపూరు జిల్లా శివిరిపలయంలోని పరమశివన్ స్వామి ఆలయంలో విగ్రహం కొన్నాళ్ల కిందట చోరీకి గురైంది. ఈ ఘటనపై కేసు నమోదు చేసిన పోలీసులు దర్యాప్తు చేపట్టి విగ్రహాన్ని కనిపెట్టారు. కుంభకోణంలోని ప్రత్యేక న్యాయస్థానం ఆధ్వర్యంలో విగ్రహాన్ని ఆలయ యాజమాన్యానికి అప్పగించారు. అయితే ఇటీవల గర్భగుడిలో ప్రతిష్టించిన ఈ విగ్రహాన్ని పరీక్షించేందుకు కోర్టులో హాజరుపరచాలని సంబంధిత అధికారి ఆదేశాలు జారీ చేశారు. దీనిపై వ్యతిరేకత వ్యక్తమయినా.. అధికారి ఆదేశాలను సమర్థిస్తూ కుంభకోణం కోర్టు సమన్లు జారీ చేసింది.
ఈ ఆదేశాలను సవాల్ చేస్తూ పిటిషనర్ మద్రాస్ హైకోర్టును ఆశ్రయించారు. దీనిపై గురువారం విచారణ చేపట్టిన హైకోర్టు.. కుంభకోణం కోర్టు ఆదేశాలు రద్దు చేసింది. ఆలయానికి వెళ్లి విగ్రహాన్ని పరీక్షించవచ్చని తెలిపింది. భక్తుల మనోభావాలను పరిగణనలోకి తీసుకొని ఈ ఆదేశాలు జారీ చేస్తున్నట్లు వెల్లడించింది.
ఇదీ చూడండి : 'ఆ ప్రయాణికులకు హోం క్వారంటైన్ తప్పనిసరి'
