'హెచ్​ఐవీ ఉందని బడి నుంచి పిల్లల బహిష్కరణ'

మహారాష్ట్రలోని ఓ పాఠశాలలో హెచ్​ఐవీ ఉందనే కారణంతో కొంతమంది చిన్నపిల్లలను బడి నుంచి బహిష్కరించినట్లు ఓ ఎన్​జీఓ ఆరోపించింది. అయితే అలాంటిదేమీ లేదని పాఠశాల ప్రధానోపాధ్యాయుడు చెబుతున్నారు.

హెచ్​ఐవీ పాజిటివ్​ అనే కారణంతో చిన్న పిల్లలను బడి నుంచి బహిష్కరించిన ఘటన మహారాష్ట్ర బీడ్​ జిల్లాలోని ఓ జిల్లా పరిషత్​ పాఠశాలలో జరిగింది. ఉపాధ్యాయులే కావాలని పిల్లలను పంపించేశారని ఇన్​ఫాంట్​​ ఇండియా అనే స్వచ్ఛంద సంస్థ అధ్యక్షుడు దత్తా బెనర్జీ ఆరోపించారు. ఈ ఘటనపై సంబంధిత మంత్రికి ఫిర్యాదు చేశారు. హెచ్​ఐవీపై అవగాహన కోసం ప్రభుత్వాలు కొన్ని కోట్ల రూపాయిలు ఖర్చు చేస్తున్నా.. ఇటువంటి సామూహిక బహిష్కరణలు జరగడాన్ని ఖండించాల్సిన అవసరం ఉందని అన్నారు బెనర్జీ.

అయితే బెనర్జీ ఆరోపణలను ఆ పాఠశాల ప్రధానోపాధ్యాయుడు తోసిపుచ్చారు. తాము ఎవరినీ బడి నుంచి బహిష్కరించలేదని చెప్పారు. బెనర్జీ పేర్కొన్న విద్యార్థులు తమ పాఠశాలలో చేరలేదని స్పష్టం చేశారు.

ఇన్​ఫాంట్​ ఇండియా సంస్థకు చెందిన విద్యార్థులు 6 నుంచి 10వ తరగతి చదివేవారు తమ బడిలో చేరారని... అయితే వారిపైనా తాము ఎటువంటి వివక్ష చూపలేదని ప్రధానోపాధ్యాయుడు కేఎస్​ లాడ్​ అన్నారు.