"కొంతకాలం కిందట బ్రహ్మదేవుని ముంగిట.. రెండు ఆత్మలు కోరుకున్నవి ఓ వరం.. రూపు రేఖలు వేరట ఊపిరొకటే చాలట.. ఆ వరాన్నే స్నేహమంటున్నాం మనం" అంటూ ఆడిపాడిన ఉత్తర్ప్రదేశ్కు చెందిన ఇద్దరు స్నేహితులిద్దరు మృతి చెందారు. ఇద్దరు మిత్రులు 70 ఏళ్ల పాటు కలిసి ఉన్నారు. వారిలో ఒకరు అనారోగ్యంతో మృతి చెందారు. ఈ విషయం తెలుసుకున్న మరో మిత్రుడు.. తన స్నేహితుడి మృతదేహాన్ని పట్టుకొని ఏడుస్తూ తన ప్రాణాలు కూడా విడిచాడు.
ఇదీ జరిగింది..
ప్రయాగ్రాజ్ జిల్లా తవాయి ప్రాంతానికి చెందిన రామ్ కృపాల్, మసూరుద్దీన్ చిన్నప్పటి నుంచి స్నేహితులు. చిన్నప్పుడు రోజంతా ఆడుతూపాడుతూ గడిపేవారు. నిద్రించడానికి మాత్రమే తమ ఇళ్లకు వెళ్లేవారు. యవ్వనంలోనూ వారిద్దరూ కలిసి ఒకే దగ్గర పనిచేసేవారు. వృద్ధాప్యంలోనూ కలిసి విహారయాత్రలకు వెళ్లేవారు. ఈ విధంగా కలిసి జీవించారు. వృద్ధాప్యంలో కూడా వారిద్దరూ కలిసి చనిపోవడం గురించే మాట్లాడుకునేవారు.
అయితే కొద్ది రోజులుగా మసూరుద్దీన్ ఆరోగ్యం దెబ్బతింది. దీంతో రామ్ కృపాల్ ప్రతిరోజూ మిత్రుడు ఇంటికి వెళ్లి అతడి ఆరోగ్య పరిస్థితి గురించి ఆరాతీస్తూ ఉండేవాడు. అనారోగ్యం కారణంగా మసూరుద్దీన్ గురువారం ఉదయం మరణించాడు. మసూరుద్దీన్ కుటుంబసభ్యులు ఈ విషయాన్ని రామ్కు తెలియనివ్వలేదు. ఎలాగోలా మిత్రుడి మరణవార్త తెలుసుకొన్న రామ్ కృపాల్ షాక్కు గురయ్యాడు. బోరున విలపిస్తూ మిత్రుడి ఇంటికి చేరుకున్నాడు. మిత్రుడి మృతదేహాన్ని కౌగిలించుకొని.. దేవుడా మిత్రుడి లేని ప్రపంచం నుంచి తనను కూడా తీసుకెళ్లమని ప్రార్థించాడు. అలా అన్న కొద్దిక్షణాల్లోనే రామ్ కూడా ప్రాణాలు విడిచాడు. దీంతో ఇరు కుటుంబాల్లో విషాదం నెలకొంది.
ఇరు కుటుంబసభ్యులు ఇద్దరి అంత్యక్రియలు కలిసి పూర్తి చేయాలనుకున్నారు. కానీ మసూరుద్దీన్ కొడుకు వేరే రాష్ట్రంలో ఉన్నాడు. మసూరుద్దీన్ కొడుకు రావడానికి కాస్త ఆలస్యం కావడం వల్ల.. గురువారం రామ్ కృపాల్ అంత్యక్రియలు నిర్వహించారు. అనంతరం శుక్రవారం మసూరుద్దీన్ అంత్యక్రియలు పూర్తి చేశారు. వీరిద్దరి స్నేహం చూడముచ్చటగా ఉండేదని గ్రామస్థులు తెలిపారు.
