డ్రీమ్11 బెట్టింగ్ యాప్ ద్వారా రూ.కోటి గెలుచుకున్నాడు ఓ గిరిజనుడు. మధ్యప్రదేశ్ సింగరౌలీ జిల్లా బిందుల్ గ్రామానికి చెందిన రామేశ్వర్ సింగ్ సోమవారం భారత్-ఆస్ట్రేలియా టీ20 వార్మప్ మ్యాచ్ కోసం యాప్లో టీమ్ సెట్ చేసి.. ఈ మొత్తం గెలుచుకున్నాడు. ఇందుకోసం రూ.49 పెట్టుబడి పెట్టానని చెప్పాడు.
రామేశ్వర్ సింగ్.. ఓ పేద గిరిజన కుటుంబానికి చెందిన వ్యక్తి. ప్రభుత్వ పాఠశాలలో తాత్కాలిక ఉపాధ్యాయునిగా పనిచేస్తున్నాడు. ఎప్పటి నుంచో డ్రీమ్11 యాప్ క్రికెట్ బెట్టింగ్ వేస్తున్నాడు. సోమవారం భారత్-ఆస్ట్రేలియా మ్యాచ్ కోసం 9 టీమ్లు సెట్ చేశాడు. మ్యాచ్ పూర్తయ్యేసరికి.. రామేశ్వర్ను అదృష్టం వరించింది. విషయం తెలిసిన అతడి కుటుంబసభ్యులు ఆనందంలో మునిగిపోయారు. గ్రామంలోని వారందరికీ మిఠాయిలు పంచి సంబరాలు చేసుకున్నారు.
"మాది చాలా పేద కుటుంబం. ఉండేందుకు సొంత ఇల్లు కూడా లేదు. డ్రీమ్11 ద్వారా నన్ను అదృష్టం వరిస్తుందని ఎప్పటినుంచో అనుకునేవాడిని. రెండేళ్లుగా డ్రీమ్11లో టీమ్లు సెట్ చేస్తున్నా. అనేక సార్లు ఎదురుదెబ్బలు తిన్నా.. నేను ఎప్పటికీ ఓటమిని అంగీకరించలేదు. ఏదొక రోజు కోటీశ్వరుడిని అవుతానని నమ్మకం ఉండేది. ఇప్పుడు రూ.కోటి గెలుచుకుని నా కల సాకారం చేసుకున్నా" అని చెప్పాడు రామేశ్వర్ సింగ్.
గతంలోనూ కొందరు డ్రీమ్11లో బెట్టింగ్ పెట్టి కోట్లు గెలుచుకున్నారు. ఇటీవలే ఉత్తర్ప్రదేశ్ పిలీభీత్లోని హరిపుర్కు చెందిన హషీమ్ రూపాయలు 2 కోట్లు గెలుచుకున్నాడు. దీంతో అతడి ఇంట్లో పండుగ వాతావరణం నెలకొంది. అదే సమయంలో.. జూదం సరదాగా మొదలెడితే.. అదే వ్యసనంగా మారుతోంది. ఒక్కసారి అలవాటైతే ఇక మన కథ కంచికి చేరడం ఖాయంగా కనిపిస్తోంది. పందేల మోజులో పడి కొందరు కుటుంబాలను ఛిన్నాభిన్నం చేసుకుంటున్నారు. హైదరాబాద్ అడ్డాగా కోట్ల రూపాయల బెట్టింగ్దందా జరుగుతోంది. బెట్టింగుల్లో నష్టపోయిన యువకులు మోసాలకు పాల్పడి జీవితాలను నాశనం చేసుకుంటున్నారు. పూర్తి వివరాల కోసం ఇక్కడ క్లిక్ చేయండి.
ఇవీ చదవండి: 'దీపావళి నాడు 3 చోట్ల బాంబ్ బ్లాస్ట్లు'.. బెదిరింపు కాల్తో పోలీసులు హైఅలర్ట్
కొత్త స్కామ్.. కరెంట్ బిల్ కట్టలేదంటూ మెసేజ్.. నమ్మి కాల్ చేస్తే రూ.3.33 లక్షలు మాయం
