సింఘు ప్రాంతం వద్ద శుక్రవారం జరిగిన ఆందోళనల్లో అలీపుర్ స్టేషన్ హౌజ్ అధికారి తీవ్రంగా గాయపడ్డారని దిల్లీ పోలీసులు తెలిపారు. అధికారి చేతికి తీవ్రంగా గాయమైందన్నారు. ఈ దాడికి పాల్పడిన నిందితుడ్ని అరెస్ట్ చేశామని ట్వీట్ చేశారు.
" రిపబ్లిక్ డే రోజు జరిగిన హింసకు వ్యతిరేకంగా స్థానికులు చేస్తున్న ఆందోళనను రిజిస్టర్ చేసేందుకు అలీపుర్ స్టేషన్ హౌజ్ అధికారి అక్కడకు వెళ్లారు. ఈ ఘటనలో అతనిపై కత్తితో దాడి జరిగింది. అతని చేతికి గాయమైంది."
--దిల్లీ పోలీసులు
వ్యవసాయ చట్టాలకు వ్యతిరేకంగా ఆందోళనలు చేస్తున్న రైతులు.. తక్షణమే ఆ ప్రాంతాన్ని ఖాళీ చేయాలంటూ ఆందోళనకు దిగారు స్థానికులు. దీంతో సింఘు సరిహద్దులో పరిస్థితి ఉద్రిక్తంగా మారింది. ఇరువర్గాలు ఒకరిపై ఒకరు రాళ్లతో దాడికి పాల్పడ్డారు. పరిస్థితిని అదుపులోకి తెచ్చేందుకు పోలీసులు బాష్పవాయువును ప్రయోగించినట్లు అధికారులు తెలిపారు. ప్రస్తుత పరిస్థితి అదుపులోనే ఉందని, ఈ ఘటనకు పాల్పడ్డవారిపై చట్టపరంగా చర్యలు తీసుకుంటామన్నారు.
ఇదీ చదవండి : సింఘులో మళ్లీ ఉద్రిక్తత- పోలీసుల లాఠీఛార్జి
