పంజాబ్ కాంగ్రెస్ ప్రభుత్వంపై అసంతృప్తిగా ఉన్న ఎమ్మెల్యే నవ్జ్యోత్ సింగ్ సిద్ధూ.. పార్టీ ప్రధాన కార్యదర్శి ప్రియాంక గాంధీ వాద్రాను దిల్లీలోని ఆమె నివాసంలో కలిశారు. అనంతరం.. ప్రియాంక గాంధీతో సుదీర్ఖ సమావేశం జరిగిందని ట్వీట్ చేశారు.
దిల్లీలో సిద్ధూను కలవనున్నట్లు వచ్చిన వార్తలను రాహుల్ గాంధీ ఖండించిన మరుసటి రోజే సిద్ధూ.. ప్రియాంకను కలవడం ప్రాధాన్యం సంతరించుకుంది.
సిద్ధూతో మాట్లాడిన తర్వాత ప్రియాంక.. రాహుల్ గాంధీ ఇంటికి వెళ్లి ఆయనతో 45 నిమిషాల పాటు చర్చించారు. ఆ తర్వాత మళ్లీ సిద్ధూతో సమావేశం అయ్యారు.
అమరీందర్కు నో అపాయింట్మెంట్!
ఇప్పటికే పంజాబ్ కాంగ్రెస్లో సంక్షోభాన్ని తొలగించేందుకు రెండు రోజులుగా పార్టీ నేతలతో సమావేశాలు జరుపుతున్నారు రాహుల్. అయితే.. 3 రోజులుగా దిల్లీలో ఉన్న ముఖ్యమంత్రి కెప్టెన్ అమరీందర్ సింగ్ను మాత్రం రాహుల్ సహా పార్టీ అధిష్ఠానం కలవకపోవడం గమనార్హం.
పంజాబ్ అసెంబ్లీ ఎన్నికలు జరగనున్న తరుణంలో.. అమరీందర్పై కొంతకాలంగా బహిరంగంగానే విమర్శలు చేస్తూ వస్తున్నారు సిద్ధూ. ఈ సమస్యను పరిష్కరించేందుకు గతంలో ఓ ప్యానెల్ను ఏర్పాటు చేయగా.. ఆ కమిటీ ముందు కూడా సిద్ధూ హాజరయ్యారు.
ఇదీ చదవండి: సీఎం X సిద్ధూ: సంక్షోభంలోకి పంజాబ్ కాంగ్రెస్!
