పంజాబ్ మాజీ మంత్రి నవజ్యోత్ సింగ్ సిద్ధూ.. దిల్లీలో కాంగ్రెస్ అధ్యక్షురాలు సోనియా గాంధీని కలిశారు. పార్టీలో తిరిగి క్రియాశీలక పాత్ర పోషించడంపై సోనియాతో ఆమె నివాసంలో జరిగిన సమావేశంలో.. సిద్ధూ చర్చించినట్టు తెలుస్తోంది. ఈ సమావేశంలో పంజాబ్ ఏఐసీసీ ప్రధాన కార్యదర్శి హరీశ్ రావత్, కాంగ్రెస్ ప్రధాన కార్యదర్శి కే.సీ వేణుగోపాల్లు కూడా పాల్గొన్నట్టు సంబంధిత వర్గాలు పేర్కొన్నాయి.
మంత్రి పదవి..!
2019లో పంజాబ్ పర్యటక మంత్రి పదవి నుంచి తప్పుకున్న అనంతరం సిద్ధూ.. రాష్ట్ర రాజకీయాలకు దూరంగా ఉన్నారు. అయితే తాజాగా జరిగిన చర్చల అనంతరం.. తిరిగి కేబినెట్ మంత్రి హోదాను ఆయన స్వీకరిస్తారని సమాచారం. గతంలో.. ఆయన చేపట్టిన పదవినే సిద్ధూకు తిరిగి ఇచ్చే అవకాశం ఉందని సంబంధిత వర్గాలు వెల్లడించాయి.
ఇప్పటికే.. పంజాబ్ ముఖ్యమంత్రి అమరిందర్ సింగ్తో భేటీ అయ్యారు సిద్ధూ.
2022లో రాష్ట్రంలో ఎన్నికలు ఉన్న తరుణంలో.. సిద్ధూ పార్టీలో క్రియాశీలకంగా వ్యవహరించడం కాంగ్రెస్కు కలిసి వచ్చే విషయం.
పంజాబ్ కాంగ్రెస్ చీఫ్ పదవి చేపట్టేందుకు సిద్ధూ యోచిస్తున్నట్టు.. అయితే ఆయనకు ఆ బాధ్యతలు అప్పగించేందుకు అమరిందర్ సింగ్ విముఖంగా ఉన్నట్టు సమాచారం.
ఇదీ చూడండి:- ఇకపై క్రియాశీల రాజకీయాల్లో ఉంటా: చిన్నమ్మ
