మహారాష్ట్ర షిర్డీలోని సాయి బాబా ఆలయనికి సీఐఎస్ఎఫ్ భద్రత ఏర్పాటు చేయడంపై.. మే 1 నుంచి తలపెట్టిన బంద్ నిర్ణయాన్ని గ్రామస్థులు వెనక్కి తీసుకున్నారు. స్థానిక ఎమ్మెల్యే, మహారాష్ట్ర రెవెన్యూ శాఖ మంత్రి రాధాకృష్ణ విఖే పాటిల్తో సమావేశమైన అనంతరం షిర్డీ గ్రామస్తులు ఈ విషయాన్ని ప్రకటించారు. కొద్ది రోజుల క్రితం ఆలయనికి సీఐఎస్ఎఫ్ భద్రతను వ్యతిరేకిస్తూ.. స్థానికులు మే 1 నుంచి బంద్కు పిలుపునిచ్చారు.
ఇదీ వివాదం..
అంతకుముందు.. ఉగ్రవాదుల నుంచి ముప్పు ఉన్న కారణంగా షిర్డీలోని సాయి మందిరానికి భద్రత రెట్టింపు చేశారు. ప్రస్తుతం సాయిబాబా ఆలయ భద్రతా ఏర్పాట్లను.. సాయి సంస్థాన్ సిబ్బంది నిర్వహిస్తోంది. ఆలయ ప్రాంగణ భద్రతను మహారాష్ట్ర పోలీసుల చూసుకుంటున్నారు. ఇందులో భాగంగా.. ఆలయాన్ని ప్రతిరోజు బాంబు స్క్వాడ్ తనిఖీ చేస్తోంది. అయితే, ఈ భద్రతా వ్యవస్థకు బదులుగా.. సీఐఎస్ఎఫ్ భద్రత కల్పించాలన్న చర్చ ప్రారంభమైంది. దీనిపై సామాజిక కార్యకర్త సంజయ్ కాలే.. 2018లో బాంబే హైకోర్టులోని ఔరంగాబాద్ బెంచ్‌లో పిటిషన్ దాఖలు చేశారు. ఈ పిటిషన్పై విచారణ జరిపిన బెంచ్.. సాయి సంస్థాన్ అభిప్రాయాన్ని కోరింది. అయితే, సీఐఎస్ఎఫ్ భద్రతకు సాయి సంస్థాన్ కూడా మద్దతు పలికింది.
అయితే, ఈ నిర్ణయాన్ని షిర్డీ గ్రామస్థులు వ్యతిరేకించి.. కోర్టును ఆశ్రయించారు. అందుకు అవసరమైన నిధులు సమకూర్చడానికి.. రెండు రోజుల క్రితం భిక్షాటన కూడా నిర్వహించారు. దీనికి సంబంధించి షిర్డీలో అఖిలపక్ష నాయకులు, గ్రామస్థుల సమావేశం జరిగింది. మహారాష్ట్ర దినోత్సవమైన మే 1 నుంచి సమ్మె చేసేందుకు నిర్ణయించారు. ఆ తర్వాత కార్యాచరణ కూడా గ్రామ సభ నిర్వహించి ఆరోజే తెలియజేస్తామని గ్రామస్థుడు నితిన్ కోటే తెలిపారు. దీంతో పాటు నాలుగు ప్రధాన డిమాండ్లు వినిపించారు.
షిర్డీ గ్రామస్థుల డిమాండ్లు ఏమిటి?
- సాయిబాబా మందిరానికి సీఐఎస్ఎఫ్ భద్రత వద్దు.
- సాయిబాబా సంస్థాన్ చీఫ్ ఎగ్జిక్యూటివ్ ఆఫీసర్ పోస్టును రద్దు చేయాలి. ప్రభుత్వ డిప్యూటీ కలెక్టర్, తహసీల్దార్, ప్రాంతీయ అధికారితో కమిటీ ఉండాలి.
- ప్రస్తుతం తాత్కాలిక కమిటీ సాయిబాబా సంస్థాన్‌ను పరిశీలిస్తోంది. దీని కారణంగా అన్ని కార్యకలాపాలు నెమ్మదించాయి. చాలా పనులపై తీసుకోవాల్సిన నిర్ణయాలు పెండింగ్‌లో ఉన్నాయి. కాబట్టి రాష్ట్ర ప్రభుత్వం సత్వరమే పూర్తి స్థాయి కమిటీని నియమించాలి.
- షిర్డీ సాయిబాబా సంస్థాన్ ట్రస్టీల బోర్డును వీలైనంత త్వరగా నియమించాలి. ఇందులో 50 శాతం ధర్మకర్తలు షిర్డీ నుంచే ఉండాలి.
ఇవీ చదవండి : 'మే 1 నుంచి షిర్డీలో బంద్!'.. భక్తులు కచ్చితంగా ఇవి తెలుసుకోవాల్సిందే..
సిద్ధరామయ్యకు తప్పిన పెను ప్రమాదం.. కారులో కూర్చుంటూ ఒక్కసారిగా..
