Rajasthan wedding news: రాజస్థాన్ చురూ జిల్లా చెలానా గ్రామంలో పెళ్లికుమారుడికి ఊహించని షాక్ ఇచ్చాడు పెళ్లికూతురు తండ్రి. అతడు చేసిన పనికి చిర్రెత్తి పోయి ఆమెకు అప్పటికప్పుడు మరో యువకుడితో పెళ్లి చేశాడు. దీంతో కంగుతున్న వరుడి కుటుంబసభ్యులు పోలీస్ స్టేషన్లో ఫిర్యాదు చేశారు. ఆదివారం రాత్రి జరిగిన ఈ ఘటన స్థానికంగా చర్చనీయాంశమైంది. వరుడి నిర్లక్ష్యం వల్లే అతనికి ఈ పరిస్థితి తలెత్తింది.
హరియాణాకు చెందిన అనిల్ జాట్ కుమారుడు మహవీర్ జాట్కు చురు జిల్లాల్లోని చెలానా గ్రామానికి చెందిన అమ్మాయితో పెళ్లి నిశ్చయమైంది. మే 15(ఆదివారం) ముహూర్తం పెట్టారు. అయితే పెళ్లిరోజు హడావుడి చేద్దామనుకున్న వరుడు 150మందితో కలిసి ఊరేగింపుగా పెళ్లికూతురు ఇంటికి వెళ్లాడు. స్నేహితులతో కలిసి ఫుల్లుగా తాగి డాన్స్ చేస్తూ రచ్చ చేశాడు. అర్ధరాత్రి సమయం 1:00 దాటినా పెళ్లిమండపానికి వెళ్లలేదు. డాన్స్ ఆపాలని చెప్పిన పెళ్లికూతురు తండ్రితో వరుడి బంధువులు గొడవకు దిగారు. తాగిన మత్తులో అలాగే డాన్స్ చేశారు. ముహూర్తం సమయం కూడా దాటి పోయింది. దీంతో చిర్రెత్తి పోయిన వధువు తండ్రి ఆమెకు అప్పటికప్పుడు మరో యువకుడితో పెళ్లి చేశాడు.
ఈ విషయం తెలిసి మహవీర్ కుటుంబ సభ్యులు కంగుతిన్నారు. సోమవారం పోలీస్ స్టేషన్కు వెళ్లి వధువు కుటుంబంపై ఫిర్యాదు చేశారు. పెళ్లి రోజే ఇంత నిర్లక్ష్యంగా ఉన్న యువకుడు తన కూతురుని జీవితాంతం బాగా ఎలా చూసుకుంటాడని వధువు తండ్రి ప్రశ్నించాడు. దీంతో పోలీసులు ఇరు కుటుంబాలతో చర్చలు జరిపారు. చివరకు ఇరు పక్షాలు రాజీ కుదుర్చుకున్నాయి.
ఇదీ చదవండి: ప్రేయసికి మరొకరితో నిశ్చితార్థం.. తుపాకీతో కాల్చి చంపిన ప్రియుడు
