జమ్ముకశ్మీర్ కుల్గాంలో బీఎస్‌ఎఫ్‌ జవాన్ల కాన్వాయ్‌పై ఉగ్రవాదులు దాడికి తెగబడ్డారు. జవాన్లు, ఉగ్రవాదుల మధ్య కాల్పులు జరిగినట్లు కశ్మీర్ ఐజీపీ విజయ్ కుమార్ తెలిపారు. కొందరు ఉగ్రవాదులను బందీగా పట్టుకున్నట్లు వెల్లడించారు. కుల్గాం జిల్లాలోని మల్పోరా వద్ద జమ్ము-శ్రీనగర్ జాతీయ రహదారిపై ఈ దాడి జరిగిందని మరో అధికారి తెలిపారు.
కొనసాగుతున్న కాల్పులు..
లష్కర్-ఏ-తోయిబాకు చెందిన ఇద్దరు ఉగ్రవాదులను భద్రతా బలగాలు పట్టుకున్నాయని కశ్మీర్ ఐజీపీ విజయ్ కుమార్ తెలిపారు. ముష్కరులకు, భద్రతా సిబ్బందికి మధ్య కాల్పులు జరుగుతున్నాయని చెప్పారు. ఈ దాడుల్లో ఇద్దరు భద్రతా సిబ్బందికి, మరో ఇద్దరు పౌరులకు గాయాలయ్యాయని పేర్కొన్నారు.
