సుప్రీంకోర్టు నియమించిన కమిటీ.. రైతులతో శుక్రవారం మరోసారి చర్చలు జరిపింది. బంగాల్ సహా మొత్తం 8 రాష్ట్రాలకు చెందిన 12 రైతు సంఘాలు ఈ భేటీలో పాల్గొన్నాయి. కొత్త సాగు చట్టాల అమలు పరిష్కారం కోసం.. ముగ్గురు సభ్యులతో కూడిన ఈ కమిటీతో ఇప్పటివరకు ఏడుసార్లు భేటీ అయ్యాయి రైతు సంఘాలు.
వీడియో కాన్ఫరెన్స్ ద్వారా జరిగిన ఈ సమావేశంలో రైతు సంఘాలు, వ్యవసాయ ఉత్పత్తి సంస్థలు(ఎఫ్పీఓ) పాల్గొన్నాయనని ఓ ప్రకటనలో తెలిపింది సుప్రీం ప్యానెల్. ఇందులో ఆంధ్రప్రదేశ్, బిహార్, జమ్ముకశ్మీర్, మధ్యప్రదేశ్, రాజస్థాన్, తెలంగాణ, ఉత్తర్ప్రదేశ్, బంగాల్కు చెందిన 12 రైతు సంఘాలు పాల్గొన్నట్టు పేర్కొంది. ఈ భేటీలో రైతులు తమ విలువైన అభిప్రాయాలు, సలహాలను ఇచ్చారని స్పష్టం చేసింది.
కేంద్ర ప్రభుత్వం తీసుకొచ్చిన వివాదాస్పద సాగు చట్టాల అమలును జనవరి 12న తాత్కాలికంగా(రెండు నెలల పాటు) నిలిపివేసింది సుప్రీం కోర్టు. ఈ నేపథ్యంలో కేంద్రం-రైతులు మధ్య సమస్యల పరిష్కారానికి సంబంధించిన నివేదిక సమర్పించాలని కమిటీని కోరింది.
కేంద్రం, అన్నదాతల మధ్య ఏర్పడిన ప్రతిష్టంభన నేపథ్యంలో.. 41 రైతు సంఘాలతో ఇప్పటివరకు 11 దఫాలుగా చర్చలు జరిపింది కేంద్రం. అయితే.. ఈ చట్టాలను పూర్తిగా రద్దు చేయాల్సిందేనని రైతు సంఘాలు డిమాండ్ చేస్తున్నందున ఇప్పటివరకు ఎలాంటి పురోగతి లేదు.
ఇదీ చదవండి: ఆత్మనిర్భర్ భారత్ లక్ష్యంగానే బడ్జెట్: నిర్మల
