కరోనాపై ఆందోళనలు సృష్టిస్తూ ప్రజలను కాంగ్రెస్ పార్టీ తప్పుదోవ పట్టిస్తోందని భాజపా జాతీయ అధ్యక్షుడు జేపీ నడ్డా అన్నారు. కరోనాపై పోరులో మోదీ ప్రభుత్వం విఫలమైందంటూ కాంగ్రెస్ చేసిన ఆరోపణలను తిప్పికొడుతూ ఆ పార్టీ అధ్యక్షురాలు సోనియా గాంధీకి నాలుగు పేజీల లేఖ రాశారు. దేశం విపత్తును ఎదుర్కొంటున్న వేళ కాంగ్రెస్ పార్టీ వైఖరి చూసి బాధకలిగిందన్నారు. రాహుల్ గాంధీ సహా పార్టీలోని సీనియర్ నేతల తీరును తీవ్రంగా వ్యతిరేకించారు.
"ఇలాంటి(కరోనా) పరిస్థితుల్లో.. కాంగ్రెస్ ప్రవర్తన చూసి బాధ కలిగింది. కానీ వారి తీరు పట్ల నేను ఆశ్చర్యపోలేదు. ప్రజలకు సహాయం చేసేందుకు మీ పార్టీలో కొందరు తీవ్రంగా కృషి చేస్తుంటే.. వారి కష్టాన్ని మొత్తం నాశనం చేస్తూ కాంగ్రెస్లోని కొందరు సీనియర్లు ప్రతికూల వ్యాఖ్యలు చేస్తున్నారు. టీకాపై అనుమానాలు సృష్టించేందుకు ఏకంగా కాంగ్రెస్ ముఖ్యమంత్రే ప్రయత్నించారు. ఇది సరైనది కాదు."
-జేపీ నడ్డా, భాజపా జాతీయ అధ్యక్షుడు
మోదీ నాయకత్వంలో దేశం అత్యంత ధైర్యసాహసాలతో కరోనాపై యుద్ధం చేస్తోందని అన్నారు నడ్డా. ఈ నేపథ్యంలో కాంగ్రెస్లోని అగ్రనేతలు ప్రజలను తప్పుదారిపట్టించడం మానుకోవాలని హితవు పలికారు. కేవలం రాజకీయ ప్రయోజనాల కోసం వారి వైఖరిని మార్చుకునే అలవాటును పార్టీ నేతలు మార్చుకుంటారని ఆశిస్తునట్టు లేఖలో పేర్కొన్నారు.
ఇదీ చూడండి:- 'సెంట్రల్ విస్టా వ్యయంతో 62 కోట్ల టీకా డోసులు'
