అంబానీ ఇంటి వద్ద పేలుడు పదార్థాలు లభించిన కారు యజమాని మన్సుఖ్ హిరేన్ మృతి కేసుపై మహారాష్ట్ర ప్రభుత్వం కీలక నిర్ణయం తీసుకుంది. అసిస్టెంట్ పోలీస్ ఇన్స్పెక్టర్ సచిన్ వాజే ను క్రైం బ్రాంచ్ నుంచి తొలగించింది. దర్యాప్తు పారదర్శకంగా జరగాలనే ఉద్దేశంతోనే ఈ నిర్ణయం తీసుకున్నట్లు మహారాష్ట్ర హోంమంత్రి అనిల్ దేశ్ముఖ్ తెలిపారు. హిరేన్ భార్య వాంగ్మూలంలో సచిన్ వాజే పేరు ఉన్నందునే అతడ్ని తప్పించినట్లు పేర్కొన్నారు. ప్రతిపక్షాలు డిమాండ్ చేయడం కూడా దీనికి కారణమన్నారు.
హిరేన్ మృతి కేసులో నిష్పాక్షికంగా, పారదర్శకంగా విచారణ జరుపుతామని అనిల్ దేశ్ముఖ్ స్పష్టం చేశారు. ఈ కేసు విచారణ పూర్తయ్యే వరకు సచిన్ వాజేకు ఇతర శాఖలో బాధ్యతలు కేటాయిస్తామన్నారు.
దక్షిణ ముంబయిలోని అంబానీ నివాసానికి సమీపంలో ఇటీవల జిలెటిన్‌ స్టిక్స్‌తో ఓ వాహనాన్ని పోలీసులు కనుగొన్నారు. అనంతరం ఆ వాహనం తనదేనని, వారం రోజుల క్రితం అది చోరీకి గురైందని మన్సుఖ్ పోలీసులకు తెలిపారు. ఈ క్రమంలోనే అదృశ్యమైన ఆయన గతవారం సముద్రపు పాయలో శవమై కనిపించారు. ఈ కేసుపై రాజకీయ దుమారం చెలరేగింది. జాతీయ దర్యాప్తు సంస్థతో విచారణ జరిపించాలని ప్రతిపక్షాలు డిమాండ్ చేశాయి.
ఇదీ చూడండి: అంబానీ ఇంటి వద్ద బాంబుల కేసులో మరో ట్విస్ట్
