Amount returned banks from Mallya: బ్యాంకుల నుంచి రుణాలు తీసుకొని విదేశాలకు పారిపోయిన విజయ్‌ మాల్యా, నీరవ్ మోదీ, మెహుల్‌ ఛోక్సీ కేసులకు సంబంధించి కేంద్ర ప్రభుత్వం తాజా సమాచారం వెల్లడించింది. ఇప్పటివరకు రూ.18వేల కోట్లను ఆయా బ్యాంకులకు బదిలీ చేసినట్లు ప్రభుత్వం తెలిపింది. ఈ విషయాన్ని భారత అత్యున్నత న్యాయస్థానానికి కేంద్ర ప్రభుత్వం తరపున సొలిసిటర్‌ జనరల్‌ తుషార్‌ మెహతా వెల్లడించారు. మనీ లాండరింగ్‌ కేసులకు సంబంధించి ఎన్‌ఫోర్స్‌మెంట్‌ డైరెక్టరేట్‌కు ఉన్న విస్తృత అధికారాలను సవాలు చేస్తూ దాఖలైన పిటిషన్ల విచారణ సందర్భంగా కేంద్ర ప్రభుత్వం ఈ వివరాలు వెల్లడించింది.
ప్రివెన్షన్‌ ఆఫ్‌ మనీ లాండరింగ్‌ (పీఎంఎల్‌ఏ)కు సంబంధించి ప్రస్తుతం 4700 కేసులను ఎన్‌ఫోర్స్‌మెంట్‌ డైరెక్టరేట్‌ దర్యాప్తు జరుపుతోందని జస్టిస్‌ ఏఎం ఖాన్విల్కర్‌ నేతృత్వంలోని సుప్రీం ధర్మాసనానికి కేంద్ర ప్రభుత్వం తరపున సొలిసిటర్‌ జనరల్‌ తుషార్‌ మెహతా వెల్లడించారు. మొత్తం రూ.67వేల కోట్ల విలువైన ఆస్తులకు సంబంధించిన కేసులు న్యాయస్థానంలో పెండింగ్‌లో ఉన్నాయన్నారు. ప్రతిఏటా ఈ కేసుల సంఖ్య మారుతుందన్న ఎస్‌జీ.. 2015-16లో 111 కేసులను స్వీకరించగా.. 2020-21లో వీటి సంఖ్య 981కి పెరిగిందన్నారు. ఇక విజయ్‌ మాల్యా, నీరవ్ మోదీ, మెహుల్‌ ఛౌక్సీ కేసులకు సంబంధించి మొత్తం రూ.18వేల కోట్లను బ్యాంకులకు అందజేశామని సుప్రీం ధర్మాసనానికి వెల్లడించారు.
పీఎంఎల్‌ఏ కింద ప్రతిఏటా తక్కువ సంఖ్యలోనే దర్యాప్తులు చేపడుతున్నామని సుప్రీం ధర్మాసనానికి కేంద్ర ప్రభుత్వం తెలిపింది. గడిచిన ఐదేళ్లలో (2016-17 నుంచి 2020-21) దేశవ్యాప్తంగా పోలీసులు, ఇతర దర్యాప్తు సంస్థలు 33లక్షల ఎఫ్‌ఐఆర్‌లు నమోదు చేయగా వాటిలో 2086 కేసులను మాత్రమే పీఎంఎల్‌ఏ కింద దర్యాప్తునకు స్వీకరించామని వెల్లడించింది. యూకే (7900), అమెరికా (1532), చైనా (4691), ఆస్ట్రియా (1036), హాంకాంగ్‌ (1823), బెల్జియం (1862), రష్యా (2764) దేశాలతో పోలిస్తే మనీలాండరింగ్‌కు సంబంధించి కేసులు తక్కువగానే దర్యాప్తు చేస్తున్నామని పేర్కొంది.
ఇదిలాఉంటే, పీఎంఎల్‌ఏ చట్టం దుర్వినియోగం అయ్యే ఆస్కారం ఉందంటూ కపిల్‌ సిబల్‌, అభిషేక్‌ మను సింఘ్వీ, ముకుల్‌ రోహత్గీ, సిద్ధార్థ్‌ లూథ్రా, అమిత్‌ దేశాయ్‌తోపాటు మరికొందరు సీనియర్‌ న్యాయవాదులు గత కొన్ని వారాలుగా సుప్రీం కోర్టుకు విన్నవిస్తున్నారు. ముఖ్యంగా కఠినమైన బెయిల్‌ నిబంధనలు, అరెస్టుకు సంబంధించి ఎటువంటి సమాచారం ఇవ్వకపోవడం, ఈసీఐఆర్‌ లేకుండానే అరెస్టు చేయడం, మనీ లాండరింగ్‌కు కచ్చితమైన నిర్వచనం, దర్యాప్తులో నిందితుడి ఇచ్చే వాంగ్మూలాన్ని సాక్షంగా అంగీకరించడం వంటి అంశాలను వారు సవాలు చేస్తున్నారు. ఈ నేపథ్యంలో జస్టిస్‌ ఏఎం ఖాన్విల్కర్‌ నేతృత్వంలోని త్రిసభ్య ధర్మాసనం వీటిని విచారిస్తోంది.
ఇదీ చూడండి: కచోడీ కోసం ట్రైన్ ఆపిన డ్రైవర్.. తర్వాత ఏమైందంటే?
