Road Accident In Jharkhand: ఝార్ఖండ్, పాకుఢ్ జిల్లాలో బుధవారం తెల్లవారుజామున ఘోర రోడ్డు ప్రమాదం జరిగింది. బస్సు- ట్రక్కు ఢీకొన్న ఘటనలో 16 మంది ప్రయాణికులు మృతిచెందారు. మరో 26 మంది తీవ్రంగా గాయపడ్డారు. సాహిబ్గంజ్- గోవింద్పుర్ రహదారిపై బుధవారం ఉదయం 8:30గంటల సమయంలో ఈ ఘటన జరిగింది.
కారణం అదే..
బస్సు బర్వా నుంచి దంకాకు వెళ్తోంది. ఎల్పీజీ సీలిండర్లు ఉన్న ట్రక్కు బస్సుకు ఎదురుగా వస్తోంది. ఈ క్రమంలో పొగమంచు కారణంగా రోడ్డు కనపడకపోవటం వల్ల రెండు వాహనాలు ఒకదానికొకటి ఢీకొన్నట్లుగా తెలుస్తోంది.
సమాచారం తెలిసిన వెంటనే అందాపరా స్టేషన్ పోలీసులు హుటాహుటిన ఘటనాస్థలికి చేరుకున్నారు. క్షతగాత్రులను స్థానిక ఆస్పత్రికి తరలించారు. బస్సులో ఇరుక్కున్నవారిని తీవ్రంగా శ్రమించి బయటకు తీశారు. ప్రమాద సమయంలో రెండు వాహనాలు అతివేగంగా దూసుకొచ్చినట్లు పోలీసులు తెలిపారు.
సీఎం విచారం..
ఈ ఘటనపై ఝార్ఖండ్ సీఎం హెమంత్ సోరెన్ విచారం వ్యక్తం చేశారు. చనిపోయినవారి కుటుంబసభ్యులకు ప్రగాఢ సానుభూతి తెలిపారు. గాయపడినవారికి మెరుగైన చికిత్స అందించాలని జిల్లా యంత్రాంగానికి ఆదేశాలు జారీ చేశారు.
ఇదీ చూడండి: దేశంలో కరోనా విజృంభణ - ఒక్కరోజే 58వేల కేసులు
