ఉత్తర్ప్రదేశ్ మథురా జిల్లాలో రిక్షా నడుపుకుంటూ బతుకుదెరువు సాగిస్తున్నాడు ప్రతాప్ సింగ్. బకల్పుర్ గ్రామంలో నివాసముంటున్న ప్రతాప్ సింగ్ కుటుంబం.. ఆయన మీదే ఆధారపడి జీవిస్తోంది. ఈ నెల 19న అతడి ఇంటికి ఐటీశాఖ అధికారులు వెళ్లారు. ప్రతాప్ సింగ్.. రూ.3కోట్ల పన్ను ఎగవేతకు పాల్పడినట్టు నోటీసులుచ్చారు. అది చూసి ప్రతాప్ సింగ్ ఒక్కసారిగా షాక్ అయ్యాడు. రిక్షా నడుపుకుంటూ జీవించే తన దగ్గర అంత మొత్తం ఎలా ఉంటుందని ఆశ్చర్యపోయాడు.
ఈ విషయంపై ఓ న్యాయవాదిని సంప్రదించాడు ప్రతాప్ సింగ్. అనంతరం హైవే పోలీస్ స్టేషన్లో ఫిర్యాదు చేశాడు.
"నాకు ఇటీవలే పాన్ కార్డు వచ్చింది. దాని కోసం నానా కష్టాలు పడాల్సి వచ్చింది. నాలుగు నెలలు తిరిగాల్సి వచ్చింది. చివరికి పాన్ దక్కింది. అది వచ్చిన కొన్ని రోజులకే ఐటీశాఖ అధికారులు వచ్చారు. నేను రూ. 3కోట్లు పన్నుఎగవేతకు పాల్పడ్డానని అంటున్నారు. నేను రిక్షా నడుపుకుంటూ కుటుంబాన్ని పోషించుకుంటున్నా. ఆదాయపు పన్నుకు నాకు సంబంధం లేదు. పోలీస్ స్టేషన్లో ఫిర్యాదు చేశాను. నాపై తప్పుడు ఆరోపణలు మోపారు."
--- ప్రతాప్ సింగ్, రిక్షా డ్రైవర్.
బాధితుడి ఫిర్యాదు మేరకు విచారణ చేపట్టారు పోలీసులు. ఐటీశాఖ అధికారులతో కూడా చర్చిస్తున్నట్టు తెలిపారు. అన్నింటినీ పరిగణలోకి తీసుకుని న్యాయం చేస్తామని హామీనిచ్చారు.
ఇదీ చూడండి:- ఐటీ దాడుల్లో బయటపడ్డ రూ.750కోట్లు- యడ్డీ కుమారుడి ఫ్రెండ్స్వే!
