ఎలక్టోరల్ బాండ్స్ రూపంలో తమిళనాడుకు చెందిన డీఎంకే(ద్రవిడ మున్నేట్ర కజగం) పార్టీకి భారీగా విరాళాలు అందాయి. 2021-22 మధ్య దేశంలోని ప్రాంతీయ పార్టీలలో డీఎంకే పార్టీ రూ.318 కోట్ల విరాళాలతో అగ్రస్థానంలో నిలిచింది. రూ.307 కోట్లతో ఒడిశాకు చెందిన బీజేడీ(బిజూ జనతా దళ్), రూ. 218 కోట్లతో బీఆర్ఎస్(భారత్ రాష్ట్ర సమితి) తర్వాత స్థానంలో ఉన్నాయి. ఈ మేరకు దేశంలోని 10 ప్రాంతీయ పార్టీలకు ఎలక్టోరల్ బాండ్ల ద్వారా.. రూ.852 కోట్ల విరాళాలు వచ్చినట్టు.. అసోసియేషన్ ఫర్ డెమోక్రటిక్ రిఫార్మ్స్ (ఏడీఆర్) గణాంకాలు వెల్లడించాయి.
2021- 22 ఏడాదిలో డీఎంకే, బీడేడీ, వైకాపా, భారాస, జేడీయూ వంటి 10 ప్రాంతీయ పార్టీలకు పెద్ద మెుత్తంలో విరాళాలు వచ్చినట్లు.. ఏడీఆర్ ప్రకటించింది. ఈ ఆర్థిక సంవత్సరంలో 36 ప్రాంతీయ పార్టీల మొత్తం ఆదాయం రూ.1213 కోట్లు అని ఏడీఆర్ చెప్పింది. ఈ మేరకు రాజకీయ పార్టీ ఎన్నికల సంఘానికి సమర్పించిన నివేదికలో పేర్కొన్నాయని తెలిపింది. ఇక, ఏడీఆర్ విశ్లేషణల ప్రకారం అన్ని పార్టీల ఆదాయంలో డీఎంకే వాటా 26.27 శాతంగా ఉంది. ఇక, టాప్ 5 పార్టీల ఆదాయం లెక్కేస్తే.. రూ.1024.42 కోట్లు అని.. ఇది మొత్తం విరాళాల్లో 84.44 శాతమని ఏడీఆర్ పేర్కొంది.
2020-21, 2021- 22 సంవత్సరాల్లో 36 పార్టీలలో 35 పార్టీల గణాంకాల అందుబాటులో ఉన్నాయి. అందులో 20 పార్టీల ఆదాయం పెరిగింది. 15 పార్టీల ఆదాయానికి గండిపడింది. ఈ 35 పార్టీ ఆదాయం 2020-21లో రూ.565.42 కోట్ల నుంచి 114.8 శాతం పెరిగి 2021-22లో రూ.1,212.70 కోట్లకు చేరింది. కాగా, ఒడిశాలో అధికారంలో ఉన్న బీజేడీకి అత్యధికంగా రూ.233.94 కోట్ల మేర విరాళాలు పెరిగాయి. బీఆర్ఎస్కు రూ.180.45 కోట్ల విరాళాలు పెరగ్గా.. డీఎంకేకు గతేడాది కంటే రూ.168.79 కోట్లు అధికంగా విరాళాలు వచ్చాయి.
వీటిలో 21 ప్రాంతీయ పార్టీలు 2021-22 సంవత్సరంలో తమ ఆదాయంలో కొంత భాగాన్ని కూడా ఖర్చు చేయలేదని ఏడీఆర్ తెలిపింది. 15 ప్రాంతీయ పార్టీలు.. తమ ఆదాయం కంటే ఎక్కువ ఖర్చు చేశాయని వివరించింది. డీఎంకే పార్టీ తన మొత్తం ఆదాయంలో రూ.283 కోట్లు ఖర్చు చేయలేదు. అలాగే బీఆర్ఎస్, బీజేడీ కూడా రూ. 278 కోట్లు, రూ. 190 కోట్లు ఖర్చు పెట్టలేదు. ఇక, అన్ని పార్టీలు కలిపి రూ.288 కోట్లు ఖర్చు చేశాయి. అందులో టాప్ 5 పార్టీలు సమాజ్వాదీ పార్టీ (రూ.54 కోట్లు), డీఎంకే (రూ.35 కోట్లు), ఆప్ (రూ.30 కోట్లు), బీజేడీ రూ.(28 కోట్లు), ఏఐడీఎమ్కే (రూ.28 కోట్లు) రూ.176.77 కోట్లు ఖర్చు చేశాయి.
