బిహార్​లో ఫలించిన వ్యూహం- కూటమిలో పెద్దన్నగా భాజపా

బిహార్​లో మోదీ పవనాలు వీచాయి. జేపీ నడ్డా ప్రణాళికలు ఫలించాయి. జేడీయూను అధిగమించి బిహార్​ ఎన్డీఏ కూటమిలో అతిపెద్ద పార్టీగా భాజపా అవతరించింది. డబుల్ ఇంజిన్ ప్రభుత్వం మేలన్న ప్రచారాలు, ఎల్​జేపీ ఓట్లు చీల్చడం భాజపాకు లాభించాయి.

బిహార్ అసెంబ్లీ ఎన్నికల్లో భారతీయ జనతా పార్టీ అద్భుత ఫలితాలను సాధించింది. ఎన్డీఏ కూటమిలో అతిపెద్ద పార్టీగా అవతరించింది.

బిహార్​లో సాధారణంగా నితీశ్ కుమార్ నేతృత్వంలోని జనతా దళ్ యునైటెడ్, లాలూ ప్రసాద్ యాదవ్​కు చెందిన రాష్ట్రీయ జనతా దళ్ మధ్యే పోటీ ఉంటుంది. అలాంటిది ఇప్పుడు రాష్ట్రంలో భాజపా తన స్థానాన్ని బలపరుచుకుంది. ఎంతో సంయమనం పాటిస్తూ బిహార్​లో నెమ్మదిగా పాగా వేసింది. ప్రధానమంత్రి నరేంద్ర మోదీ ప్రజాకర్షణ శక్తితో పాటు జేపీ నడ్డా ప్రణాళికలతో మెరుగైన ఫలితాలు రాబట్టింది. జేడీయూ, విపక్ష కాంగ్రెస్, ఆర్జేడీని తోసిరాజని భారీ విజయాన్ని అందుకుంది.

ఫలించిన డబుల్ ఇంజిన్!

భాజపా ఈ ఎన్నికలను ప్రతిష్టాత్మకంగా తీసుకుంది. ఎన్నికలు జరిగిన నియోజకవర్గాల్లో విస్తృతంగా ప్రచారం నిర్వహించింది. ప్రధాని మోదీ 12 బహిరంగ ప్రచార సభలలో పాల్గొన్నారు. కేంద్రంలో, రాష్ట్రంలో ఒకే ప్రభుత్వం ఉండటం వల్ల కలిగే మేలును ప్రజలకు వివరించారు. ఆర్జేడీ అరాచక పాలన వల్ల సమస్యలు ఎదురయ్యాయని విమర్శలు చేశారు. ఈ ప్రచారాలు ఫలితాన్నిచ్చాయి. ప్రజల మద్దతు కూడగట్టగలిగాయి.

మరోవైపు నితీశ్ కుమార్​ విషయంలో భాజపా వ్యూహాత్మకంగా వ్యవహరించింది. ఆయన్ను ముఖ్యమంత్రి అభ్యర్థిగా నిలబెడుతూనే.. తన పార్టీ బలోపేతంపైనా దృష్టిసారించింది. జేడీయూ పట్ల ఉన్న అసంతృప్తి తనపై పడకుండా జాగ్రత్తపడింది.

లోక్​జనశక్తి పార్టీ(ఎల్​జేపీ) నేత చిరాగ్ పాసవాన్ వైఖరితో దళితుల ఓట్లు దూరమవుతాయన్న ఆందోళన తొలుత వ్యక్తమైంది. రాంవిలాస్ పాసవాన్ మృతితో సానుభూతి ఓట్లు ఎల్​జేపీకి వెళ్తాయన్న అనుమానాలు కలిగాయి. అయితే జీతన్​రామ్ మాంఝీకి చెందిన హిందుస్థాన్ ఆవామ్ మోర్చా ఎన్డీఏతోనే ఉండటం భాజపాకు కలిసొచ్చింది. దళితుల ఓట్లను కాపాడుకోగలిగింది. మరోవైపు ఎల్​జేపీ వేరుగా పోటీ చేసి ఓట్లు చీల్చడమూ భాజపా అతిపెద్ద పార్టీగా అవతరించేందుకు కారణమైంది.

ఎల్​జేపీ- కాషాయ వ్యూహం?

ఎన్డీఏ నుంచి వైదొలగాలనే చిరాగ్ పాసవాన్‌ నిర్ణయం వెనుక భాజపా పెద్దలు ఉన్నారనే వార్తలు ముందు నుంచీ వినిపించాయి. జేడీయూ అభ్యర్థులను ఓడించి అసెంబ్లీలో అతిపెద్ద పార్టీగా అవతరించి సీఎం పీఠాన్ని అధిష్ఠించాలన్నదే కమలనాథుల వ్యూహంగా రాజకీయ విశ్లేషకులు భావిస్తున్నారు. ఎన్డీఏ నుంచి బయటకు వచ్చినా.. భాజపా నాయకత్వానికి కట్టుబడి ఉంటామని ప్రకటించడం వెనక రహస్యం దాగి ఉందని చెబుతున్నారు. ఈ వ్యూహం ఎవరిదైనా, ఇందులో ఎంత నిజం ఉన్నా.. రాష్ట్ర రాజకీయాలను భాజపా కీలక మలుపుతిప్పిందన్నది మాత్రం వాస్తవం.

బూత్ స్థాయి ప్రచారం

నిజానికి గత ఎన్నికల్లోనూ భాజపాకు వచ్చినన్ని ఓట్లు మరే పార్టీకీ రాలేదు. 2015 అసెంబ్లీ ఎన్నికల్లో జేడీయూ, ఆర్జేడీ కలిసి పోటీ చేసి అధికారంలోకి వచ్చాయి. ఆర్జేడీ 80, జేడీయూ 70 స్థానాలు గెలిచాయి. భాజపా 53 సీట్లు దక్కించుకొని మూడో స్థానంలో నిలిచింది. అయితే మొత్తం ఓట్లలో ఎక్కువ భాగం భాజపాకే దక్కాయి. 24.4 శాతం ఓట్లతో భాజపా తొలిస్థానంలో నిలవగా.. ఆర్జేడీ(18.4%), జేడీయూ(16.8%) తర్వాతి స్థానంలో నిలిచాయి.

ఆ తర్వాత జేడీయూ-ఆర్జేడీ ప్రభుత్వం కూలిపోయి.. ఎన్డీఏ సర్కారు వచ్చిన తర్వాత భాజపాకు మరింత ఉత్సాహం లభించింది. రాష్ట్రంలో పార్టీని స్థిరీకరించేందుకు కంకణం కట్టుకుంది కమలదళం. ఈ కార్యక్రమాన్ని భాజపా జాతీయ అధ్యక్షుడు జేపీ నడ్డా ముందుండి నడిపించగా.. అపర చాణక్యుడు అమిత్​షా తెరవెనక వ్యూహాలతో కీలక పాత్ర పోషించారు. అధిష్ఠానం అండతో కార్యకర్తలు చురుగ్గా పనిచేయడం మొదలుపెట్టారు. దీంతో బూత్​ స్థాయిలో పార్టీ బలపడింది.

సుశాంత్ సింగ్ రాజ్​పుత్

బాలీవుడ్ యువ నటుడు సుశాంత్ సింగ్ రాజ్​పుత్ మరణం బిహార్​లో రాజకీయ రంగు పులుముకుంది. సుశాంత్ స్వస్థలం బిహార్​ రాష్ట్రమే కావడం, నటుడి మరణంపై అనుమానాలు నెలకొనడం రాజకీయ వర్గాల్లోనూ సర్వత్రా చర్చనీయాంశమైంది. మహారాష్ట్రలో మరణించిన సుశాంత్ మృతికి సంబంధించి సీబీఐ సైతం దర్యాప్తు చేపట్టింది.

'బిహార్​ ముద్దుబిడ్డ' సుశాంత్ మరణంపై సరైన విచారణ జరగాలని డిమాండ్ చేస్తూ వచ్చింది భాజపా. ప్రజల్లోకి ఈ విషయాన్ని తీసుకెళ్లేందుకు ప్రయత్నించింది. 'జస్టిస్ ఫర్ సుశాంత్ సింగ్' నినాదంతో వేలాది ప్రచార పత్రాలు, టోపీలు, మాస్కులను పంపిణీ చేసింది. సామాజిక మాధ్యమాల్లోనూ భాజపా చురుగ్గా వ్యవహరించింది. స్థానికుల్లో నటుడి పట్ల ఉన్న సానుభూతి భాజపాకు కలిసొచ్చినట్లు చెబుతున్నారు.

ప్రాజెక్టులు

కేంద్ర ప్రభుత్వం సైతం బిహార్ పట్ల ప్రత్యేక శ్రద్ధ చూపించింది. రాష్ట్రానికి ప్రత్యేక ప్రాజెక్టులు మంజూరు చేసింది. కనీస అవసరాలైన మంచినీటి సరఫరాకు పెద్దపీట వేసింది. ఎన్నికలకు ముందు రూ. 541 కోట్ల వ్యయంతో ప్రాజెక్టులకు మోదీ శంకుస్థాపనలు చేశారు.