Rakesh Tikait News: భారతీయ కిసాన్ యూనియన్ నేత రాకేశ్ టికాయిత్కు మరోసారి బెదిరింపు కాల్స్ వచ్చాయి. దీనిపై గాజియాబాద్‌లోని కౌశాంబి పోలీస్ స్టేషన్లో కేసు నమోదు చేశారు. ఫోన్కాల్ ద్వారా బెదిరింపులకు పాల్పడినట్లు అధికారులు తెలిపారు. టికాయిత్ భద్రతలో నిమగ్నమైన ఉత్తర్ప్రదేశ్ పోలీసు సిబ్బంది నితిన్‌కు ఈ మేరకు ఫోన్కాల్ వచ్చినట్లు పేర్కొన్నారు. నిందితుడు మొదట అసభ్యంగా మాట్లాడి.. ఆపై చంపేస్తానని బెదిరించాడని.. అయితే దాని వెనుకున్న ఉద్దేశాన్ని బయటపెట్టలేదని చెప్పారు.
ఈ ఘటనపై విచారణ జరుపుతున్నట్లు పోలీస్‌స్టేషన్‌ ఇన్‌ఛార్జీ సచిన్ మాలిక్ తెలిపారు. బెదిరింపునకు సంబంధించిన ఆడియో క్లిప్ను టికాయిత్ ద్వారా అందుకుని.. దాని ఆధారంగా తదుపరి విచారణ జరుపుతామని వెల్లడించారు.
టికాయిత్కు గతంలో కూడా పలుమార్లు ఇదే తరహాలో బెదిరింపులు వచ్చాయి.
మరో నేత హత్యకు కుట్ర
మరో బీకేయూ నేత, టికాయిత్ సన్నిహితుడు జయ మాలిక్ హత్య కుట్రను పోలీసులు భగ్నం చేశారు. ఘాజీపుర్ సరిహద్దులో టికాయిత్ నిర్వహిస్తున్న ఉద్యమంలో కీలక పాత్ర పోషిస్తున్న మాలిక్ను హత్య చేసేందుకు ప్రయత్నించిన కిషోర్, సోనూలను పోలీసులు అరెస్ట్ చేశారు. డిసెంబరు 3న జరిగిన ఈ ఘటన ఆలస్యంగా వెలుగులోకి వ్చచింది. మోదీనగర్‌కు చెందిన వీర్సేన్, సంజయ్ ప్రధాన్ ఈ కుట్ర పన్నినట్లు అధికారులు తెలిపారు. ఈ పని కోసం పెరోల్‌పై వచ్చిన కిషోర్, సోనూలకు రూ.10 లక్షల సుపారీ ఇచ్చారని చెప్పారు.
నిందితులను రెండు రోజుల క్రితం భోజ్‌పుర్‌లో పట్టుకున్నారు. ఆ ప్రాంతంలో ఇద్దరు అనుమానితులు సంచరిస్తున్నట్లు సమాచారం అందుకున్న పోలీసులు.. వారిని పట్టుకునేందుకు ప్రయత్నించారు. దీంతో తప్పించుకునేందుకు ప్రయత్నించిన నిందితులపై కాల్పులు జరిపారు అధికారులు. ఆ తర్వాత అదుపులోకి తీసుకున్నారు. వారిని విచారించగా అసలు విషయం బయటపడింది. దీంతో వీర్సేన్, సంజయ్ ప్రధాన్లను అదుపులోకి తీసుకున్నారు.
ఇదీ చూడండి: మహారాష్ట్రలో మరో 7 ఒమిక్రాన్ కేసులు
