కొవిడ్పై పోరులో ఆశాకిరణంలా 2-డీయాక్సీ-డీ గ్లూకోజ్‌(2-డీజీ) ఔషధం అందుబాటులోకి వచ్చిందని రక్షణ మంత్రి రాజ్నాథ్ సింగ్ పేర్కొన్నారు. ఈ ఔషధాన్ని రూపొందించిన రక్షణ పరిశోధన, అభివృద్ధి సంస్థ(డీఆర్డీఓ)ను ఆయన ప్రశంసించారు. కేంద్ర ఆరోగ్య శాఖ మంత్రి హర్షవర్ధన్తో కలిసి 2-డీజీ ఔషధాన్ని ఆయన దిల్లీలో విడుదల చేశారు. తొలి బ్యాచ్‌ 2-డీజీ సాషెట్లను కేంద్ర ఆరోగ్య మంత్రి హర్షవర్ధన్‌కు అందించారు. ఆరోగ్య మంత్రి వాటిని దిల్లీ ఎయిమ్స్‌ డైరెక్టర్‌ డాక్టర్‌ రణదీప్‌ గులేరియాకు ఇచ్చారు.
"దేశం ఆపదలో ఉన్నప్పుడల్లా డీఆర్డీఓ అండగా నిలుస్తోంది. 2-డీజీ ఔషధాన్ని అభివృద్ధి చేసినందుకు డీఆర్డీఓ ఛైర్మన్ జి.సతీష్ రెడ్డికి, శాస్త్రవేత్తలకు నా హృదయపూర్వక అభినందనలు. మన దేశంలో విపత్తు వేళ ఆశాకిరణంలా ఈ ఔషధం అందుబాటులోకి వచ్చింది. ఇది శాస్త్రీయ పురోగతికి గొప్ప ఉదాహరణ. మన దేశం ముందున్న కఠిన పరిస్థితులను ఎదుర్కోగల సామర్థ్యం మన శాస్త్రవేత్తలకు ఉందని నేను నమ్ముతున్నాను.
-రాజ్నాథ్ సింగ్, రక్షణ శాఖ మంత్రి
ఆక్సిజన్ అవసరం తగ్గతుంది..
2-డీజీ ఔషధంతో కొవిడ్ రోగుల్లో ఆక్సిజన్పై చికిత్స పొందే సమయం తగ్గుతుందని కేంద్ర ఆరోగ్య శాఖ మంత్రి హర్షవర్ధన్ పేర్కొన్నారు. భవిష్యత్లో ఈ ఔషధాన్ని ప్రపంచ దేశాల్లో కూడా వినియోగిస్తారని అన్నారు.
"దేశీయంగా కొవిడ్ చికిత్స కోసం రూపొందించిన తొలి ఔషధం 2-డీజీనే కావచ్చు. ఇది ఆక్సిజన్పై చికిత్స పొందే సమయాన్ని తగ్గిస్తుంది. ఈ ఔషధం.. భారత్లోనే కాకుండా ప్రపంచ దేశాలకు కూడా రానున్న రోజుల్లో ఉపయోగపడతుందని నమ్ముతున్నాను. ఏడాదిపైగా కాలం నుంచి మనం.. కొవిడ్ మహమ్మారిపై పోరాడుతున్నాం. వ్యాక్సిన్ను మన శాస్త్రవేత్తలు రూపొందించి ప్రజలకు అందుబాటులోకి తెచ్చారు. నేను డీఆర్డీఓ శాస్త్రవేత్తలకు కృతజ్ఞతలు చెబుతున్నాను. కరోనాపై పోరులో ప్రధానమంత్రి నాయకత్వంలో డీఆర్డీఓ కీలక పాత్ర పోషించింది."
-హర్షవర్ధన్ సింగ్, కేంద్ర ఆరోగ్య మంత్రి
హైదరాబాద్‌కు చెందిన డాక్టర్‌ రెడ్డీస్‌ ల్యాబ్‌తో కలిసి ఈ ఔషధాన్ని డీఆర్డీఓ అభివృద్ధి చేసింది. ఈ ఔషధం అత్యవసర వినియోగానికి డీసీజీఐ ఇప్పటికే అనుమతి ఇచ్చింది. నీటిలో కలుపుకొని తాగేలా పౌడర్‌ రూపంలో 2-డీజీ ఔషధం తయారు చేశారు.
ఇదీ చూడండి: వారిలో ఆసుపత్రి అవసరం 0.06% మందికే!
ఇదీ చూడండి: తగ్గుతున్న ఉద్ధృతి- కొత్త కేసులు 2.81 లక్షలు
