ప్రధాన మంత్రి నరేంద్ర మోదీ 'మన్ కీ బాత్' కార్యక్రమంపై విమర్శనాస్త్రాలు సంధించారు కాంగ్రెస్ నేత రాహుల్ గాంధీ. నెలకోసారి అర్థం లేని మాటలు మాట్లాడుతూ కొవిడ్ను జయించలేం అని ట్వీట్ చేశారు.
"కొవిడ్ సంక్షోభాన్ని ఎదుర్కోవాలంటే.. సరైన ఉద్దేశం, సరైన విధానం, సంకల్పం ఉండాలి. నెలకోసారి అర్థంలేని మాటలు మాట్లాడటం కాదు."
--రాహుల్ గాంధీ, కాంగ్రెస్ నేత.
వ్యాక్సినేషన్కు సరైన వ్యూహం లేనందునే కొవిడ్ సెకండ్ వేవ్ వచ్చిందని రాహుల్ గాంధీ దుయ్యబట్టారు.
77వ మన్కీ బాత్ కార్యక్రమంలో ఆదివారం మోదీ మాట్లాడిన నేపథ్యంలో రాహుల్ ట్వీట్కు ప్రాధాన్యం ఏర్పడింది.
అంతటా లోపాలే..
మోదీ ఏడేళ్ల పాలనను ఉద్దేశించి కాంగ్రెస్ నేతలు విమర్శలు చేశారు. ప్రధాని.. ప్రజల నమ్మకాన్ని వమ్ము చేశారని ఆరోపించారు. అది దేశ ప్రజలకే ప్రమాదమని వ్యాఖ్యానించారు.
ప్రభుత్వం చేసిన తప్పులను ఏడు పాయింట్ల రూపంలో ఎత్తిచూపారు. ఈ మేరకు 'భారత్ మాతాకీ కహానీ' పేరుతో 4 నిమిషాల వీడియో షేర్ చేశారు.
గత ఏడేళ్లుగా ప్రజలను మోసం చేస్తు మోదీ ప్రభుత్వం పాలన కొనసాగిస్తోందని కాంగ్రెస్ అధికార ప్రతినిధి రణ్దీప్ సూర్జేవాలా అన్నారు. ప్రస్తుతం దేశం ఇంత దారుణమైన పరిస్థితుల్లో ఎందుకుందని ప్రశ్నించే సమయం ఆసన్నమైందని వ్యాఖ్యానించారు.
ప్రజలకు ఇవ్వడానికి నరేంద్ర మోదీ దగ్గర ఏమీ లేదని శివసేన ఎంపీ సంజయ్ రౌత్ అన్నారు. 'ప్రజలు అంబానీ, టాటా, అదానీ కావాలని ఆశించట్లేదు. వారికి కనీస అవసరాలైన.. కూడు, గూడు, బట్ట అందిస్తే చాలు' అని అన్నారు.
ఇదీ చదవండి:Mann Ki Baat: 'సబ్కా సాత్, వికాస్, విశ్వాస్ మంత్రంతో ముందుకు'
