దేశంలో ఖాళీగా ఉన్న 7 రాజ్యసభ స్థానాలకు ఎన్నికలు(rajya sabha election 2021) నిర్వహించేందుకు షెడ్యూల్ ప్రకటించింది ఎన్నికల సంఘం. పుదుచ్చేరి, బంగాల్, అసోం, మహారాష్ట్ర, మధ్యప్రదేశ్లో ఒక్కో స్థానం, తమిళనాడులో రెండు స్థానాలు ఖాళీ అయ్యాయి. వాటికి అక్టోబర్ 4న ఎన్నికలు(rajya sabha bypoll) నిర్వహించాలని నిర్ణయించింది ఈసీ. ఈ క్రమంలో కాంగ్రెస్ పార్టీలో అంతర్గతంగా వాతావరణం వెడెక్కింది. టికెట్ కోసం అధిష్ఠానాన్ని కాకా పట్టేందుకు నేతలు పోటీ పడుతున్నట్లు తెలుస్తోంది.
రెండు స్థానాల్లో..
హస్తం పార్టీ ఈ ఎన్నికల్లో రెండు స్థానాల్లో పోటీ పడే అవకాశం ఉంది. అందులో ఒకటి తమిళనాడు, మరొకటి మహారాష్ట్ర. అసెంబ్లీ ఎన్నికల సందర్భంగా కుదిరిన ఒప్పందం ప్రకారం తమిళనాడులో ఒక రాజ్యసభ స్థానాన్ని కాంగ్రెస్కు ఇస్తానని డీఎంకే హామీ ఇచ్చింది. మరోవైపు.. మహారాష్ట్రలో కాంగ్రెస్ నేత రాజీవ్ సాతవ్ మృతితో ఆయన స్థానం ఖాళీ ఏర్పడింది.
ఆశావాహుల్లో కీలక నేతలు..
రాజ్యసభలో మాజీ ప్రతిపక్ష నేత గులాం నబీ ఆజాద్, ముకుల్ వాస్నిక్, మిలింద్ డియోరా, సంజయ్ నిరుపమ్, ప్రమోద్ తివారీ సహా పలువురు నేతలు టికెట్ ఆశిస్తున్నట్లు సమాచారం.
అయితే తమిళనాడులో.. పార్టీ డేటా విశ్లేషణ విభాగం ఛైర్మన్ ప్రవీణ్ చక్రవర్తి పట్ల కాంగ్రెస్ నేత రాహుల్ గాంధీ సానుకూలంగా ఉన్నట్లు పార్టీ వర్గాలు తెలిపాయి. కానీ, రాజకీయేతర వ్యక్తిని ఎగువ సభకు పంపేందుకు డీఎంకే నాయకత్వం సుముఖంగా లేనట్లు సమాచరాం. మరోవైపు.. గులాం నబీ ఆజాద్ డీఎంకే నేతలతో మంచి సంబంధాలు నెరుపుతున్నట్లు తెలుస్తోంది. ప్రియాంక గాంధీ సన్నిహితుల్లో ఒకరైన.. ప్రమోద్ తివారీ పేరు వెలుగులోకి వచ్చింది. ఆయన రాజ్యసభ ఎన్నికల్లో పోటీ చేయాలని భావిస్తున్నట్లు పార్టీ నేతలు తెలిపారు.
మహారాష్ట్రలో.. ఖాళీగా ఉన్న ఒకే ఒక స్థానానికి ముగ్గురు నేతలు పోటీ పడుతున్నట్లు సమాచారం. ఎస్సీ వర్గానికి చెందిన నేత ముకుల్ వాస్నిక్, మిలింద్ డియోరా, కాంగ్రెస్ పార్టీ ముంబయి విభాగం మాజీ అధ్యక్షుడు సంజన్ నిరుపమ్లు టికెట్ కోసం చూస్తున్నారు. రాజ్యసభ ఎన్నికల వేళ గత వారమే రాహుల్ గాంధీని నిరుపమ్ కలవటం ప్రాధాన్యం సంతరించుకుంది.
గులాం నబీ ఆజాద్, వాస్నిక్, వీరప్ప మొయిలీ సహా ఆశావాహుల్లోని పలువురు నేతలు జీ-23కి చెందిన వారు. మొయిలీ, వాస్నిక్లు రాహుల్ గాంధీతో సంబంధాలు మెరుగుపరుచుకున్నట్లు పార్టీ వర్గాలు తెలిపాయి.
భాజపా..
భాజపా సైతం రెండు స్థానాల్లో పోటీ పడే అవకాశం ఉంది. మధ్యప్రదేశ్లో ఒకటి, అసోంలో ఒక స్థానంలో తమ అభ్యర్థులను బరిలోకి దింపనుంది. అసోం నుంచి సర్బానంద్ సోనోవాల్ను రాజ్యసభకు పంపే అవకాశాలు మెండుగా ఉన్నాయి. పుదుచ్చెరీలోని స్థానం.. ఎన్డీఏ భాగస్వామ్య పార్టీకి వెళ్లనుంది. బంగాల్లో కాంగ్రెస్ నుంచి టీఎంసీలో చేరిన సుశ్మిత దేవ్ బరిలో దిగే అవకాశం ఉంది.
ఇదీ చూడండి:'వచ్చే ఎన్నికల్లో చిన్న పార్టీలతోనే కాంగ్రెస్ జట్టు'
