Kashmir pandit killed: జమ్ముకశ్మీర్, బుద్గాం జిల్లా చదూరా తహసీల్ కార్యాలయం ఉద్యోగి రాహుల్ భట్ను.. గురువారం ఆఫీస్లోనే కాల్చి చంపారు ఉగ్రవాదులు. దీంతో ఆ ప్రాంతంలో ఉద్రిక్త పరిస్థితులు నెలకొన్నాయి. పండిట్లపై జరుగుతున్న దాడులను నిరసిస్తూ కశ్మీర్ పండిట్ వర్గం ప్రభుత్వ ఉద్యోగులు, వారి కుటుంబ సభ్యులు బుద్గాం నగరంలో శుక్రవారం ఆందోళనకు దిగారు. రోడ్డుపై బైఠాయించి.. ప్రభుత్వానికి వ్యతిరేకంగా నినాదాలు చేశారు.
" ప్రతి ఒక్కరు తనతో చక్కగా ప్రవర్తిస్తారని, తనకు ఎవరూ హాని చేయరని ఆయన చెప్పేవారు. అయినప్పటికీ ఆయన్ని ఎవరూ రక్షించలేదు. ఉగ్రవాదులు రాహుల్ గురించి ఎవరినైనా అడిగే ఉంటారు. లేకపోతే ఎలా తెలుస్తుంది."
- రాహుల్ భట్ భార్య
బుద్గాంలోని విమానాశ్రయం వైపు వెళ్తున్న ఆందోళనకారులను అడ్డుకునేందుకు లాఠీఛార్జ్ చేశారు పోలీసులు. బాష్పవాయువు ప్రయోగించారు. పోలీసుల తీరుపై నిరసనకారులు ఆగ్రహం వ్యక్తం చేశారు. 'ప్రజలపై లాఠీఛార్జ్, బాష్పవాయువు ప్రయోగించగలిగినప్పుడు.. నిన్న ఉగ్రవాదిని ఎందుకు పట్టుకోలేకపోయారు?' అని అపర్ణ పండిట్ అనే ఓ నిరనసకారురాలు పోలీసులను ప్రశ్నించారు.
భద్రత కల్పించకపోతే రాజీనామాలు: రాహుల్ భట్ను ఉగ్రవాదులు హత్య చేసిన క్రమంలో వందల సంఖ్యలో కశ్మీర్ పండిట్లు నిరసనలు చేపట్టారు. శ్రీనగర్ విమానాశ్రయానికి వెళ్లే రోడ్డును బ్లాక్ చేశారు. భాజపా ప్రభుత్వం, ప్రధాని మోదీకి వ్యతిరేకంగా నినాదాలు చేశారు. తమకు సరైన భద్రత కల్పించకపోతే ఉద్యోగాలకు మూకుమ్మడిగా రాజీనామాలు చేస్తామని హెచ్చరించారు.
'లెఫ్టినెంట్ గవర్నర్ మా ప్రాంతాన్ని సందర్శించి సరైన భద్రత కల్పిస్తామనే భరోసా ఇవ్వాలని అధికారులకు తెలిపాం. కానీ, ఆయన రాలేదు. రాహుల్ భట్ కుటుంబానికి రూ.1 కోటి పరిహారం ఇవ్వాలి. పిల్లలకు విద్య, భార్యకు ప్రభుత్వ ఉద్యోగం ఇవ్వాలి. మాకు ఈ ఉద్యోగం వద్ద. మూకుమ్మడిగా రాజీనామా చేసేందుకు సిద్ధంగా ఉన్నాం. మమ్మల్ని జమ్మూకు బదిలీ చేయాలి.' అని డిమాండ్ చేశారు ఓ మహిళ.
అనంతనాగ్లోనూ..: కశ్మీర్ పండిట్ వర్గం ప్రభుత్వ ఉద్యోగి రాహుల్ భట్ను ఉగ్రవాదులు కాల్పి చంపటంపై అనంతనాగ్లోనూ నిరసనలు వెల్లువెత్తాయి. బాధిత కుటుంబానికి న్యాయం చేయాలని డిమాండ్ చేసింది కశ్మీర్ పండిట్ ఉద్యోగుల సంఘం. తాము ప్రశాంతంగా ఉండగలమని అనిపించే ప్రాంతాలకు తమను పంపించాలని ప్రభుత్వాన్ని కోరింది.
నిరసనల మధ్యే అంత్యక్రియలు: నిరసనల మధ్యే కశ్మీర్ పండిట్ రాహుల్ భట్ అంత్యక్రియలు పూర్తయ్యాయి. గురువారం హాత్య జరగగా.. శుక్రవారం ఉదయం జమ్మూలోని దుర్గానగర్ ప్రాంతంలో ఉన్న నివాసానికి మృతదేహాన్ని తీసుకొచ్చారు. బంటాలాబ్ శ్మశానవాటికలో రాహుల్కు ఆయన సోదరుడు సన్నీ దహన సంస్కారాలు పూర్తి చేశారు. రాహుల్ భట్ అంత్యక్రియల్లో వందల మంది కశ్మీర్ పండిట్లు పాల్గొన్నారు. ఈ సందర్భంగా భాజపా నేతృత్వంలోని కేంద్ర ప్రభుత్వంపై విమర్శలు గుప్పించారు కుటుంబ సభ్యులు, కశ్మీర్ పండిట్లు. పునరావాసం పేరుతో కశ్మీర్ హిందూలను తుపాకులకు మేతగా వేస్తున్నారని ఆరోపించారు. కశ్మీర్లోయలో శాశ్వత నివాసం ఏర్పరచుకోవాలనుకుంటున్న తమ కలలను రాహుల్ ఘటన చెరిపేసిందన్నారు. అంత్యక్రియలకు హాజరైన జమ్ముకశ్మీర్ భాజపా అధ్యక్షుడు రవీంద్ర రైనాకు నిరసనల సెగ తగిలింది. ప్రధాని నరేంద్ర మోదీ, జమ్ముకశ్మీర్ లెఫ్టినెంట్ గవర్నర్ మనోజ్ సిన్హా, కాషాయ పార్టీకి వ్యతిరేకంగా నినాదాలు చేశారు పండిట్లు.
పుల్వామాలో పోలీసు అధికారి హత్య: జమ్ముకశ్మీర్, పుల్వామా జిల్లాలోని గుడూరా గ్రామానికి చెందిన పోలీసు కానిస్టేబుల్ రియాజ్ అహ్మద్ థోకర్పై ఇంట్లోకి చొరబడి కాల్పులు జరిపారు ఉగ్రవాదులు. వెంటనే ఆర్మీ 92వ బేస్ ఆసుపత్రికి తరలించగా.. చికిత్స పొందుతూ మృతి చెందారు. 24 గంటల్లో ఉగ్రవాదులు దాడి చేయటం ఇది రెండోసారిగా అధికారులు తెలిపారు.
ఇదీ చూడండి: 12 ఏళ్ల బాలికపై అత్యాచారం.. డబ్బు కోసం సొంత తాతయ్యనే..
'నేను చనిపోలే.. సమాధిలోకి వెళ్లా అంతే! 27 మంది డాక్టర్లతో..'
