Pregnant women: దేశంలో కొవిడ్ కేసులు భారీగా పెరుగుతున్న నేపథ్యంలో కేంద్రం కీలక నిర్ణయం తీసుకుంది. గర్భిణీలు, దివ్యాంగులైన కేంద్ర ప్రభుత్వ ఉద్యోగులు.. ఆఫీసులకు వెళ్లాల్సిన అవసరం లేదని ప్రకటించింది. వారికి ఇంటి నుంచి పని చేసే వెసులుబాటు కల్పిస్తున్నట్లు స్పష్టం చేసింది.
కొవిడ్ కంటైన్మెంట్ జోన్లలో నివాసం ఉంటున్న అధికారులు, ఇతర సిబ్బందికి కూడా మినహాయింపు ఉంటుందని వెల్లడించారు సిబ్బంది వ్యవహారాల సహాయ మంత్రి జితేంద్ర సింగ్.
అన్ని ప్రభుత్వ కార్యాలయాల్లోనూ కార్యదర్శి కంటే కిందిస్థాయి ఉద్యోగుల హాజరును 50 శాతానికి పరిమితం చేయనున్నట్లు ప్రకటనలో వెల్లడించారు. మిగతా 50 శాతం మంది ఇంటి నుంచి పనిచేస్తారని తెలిపారు. అందుకు అనుగుణంగా జాబితా సిద్ధం అవుతుందని ప్రకటించారు.
- వర్క్ ఫ్రం హోం చేసే ఉద్యోగులు.. టెలిఫోన్, ఇతర ఎలక్ట్రానిక్ సాధనాల ద్వారా అందుబాటులోనే ఉంటారని పేర్కొన్నారు కేంద్ర మంత్రి.
- అధికారిక సమావేశాలను దాదాపు వీడియో కాన్ఫరెన్స్ పద్ధతిలోనే నిర్వహించాలని సూచించారు.
ఈ మేరకు కొత్త మార్గదర్శకాలను విడుదల చేసిన సిబ్బంది వ్యవహారాల మంత్రిత్వ శాఖ.. జనవరి 31వరకు ఇవి అమల్లో ఉండనున్నట్లు ప్రకటనలో తెలిపింది.
దిల్లీలో కరోనా కేసులు అంతకంతకూ పెరిగిపోతున్నాయి. శనివారం 20 వేల మందికిపైగా వైరస్ సోకింది. పాజిటివిటీ రేటు 19.60 శాతానికి పెరిగింది. ఈ నేపథ్యంలోనే కేంద్రం కీలక నిర్ణయం తీసుకుంది.
India Corona cases: దేశంలో రోజువారీ కొవిడ్ కేసులు భారీగా నమోదవుతున్నాయి. శనివారం ఉదయం నుంచి ఆదివారం ఉదయం వరకు 1,59,632 మంది వైరస్ బారిన పడ్డారు. కరోనా వల్ల మరో 327మంది మృతి చెందారు. 40,863 మంది వైరస్ నుంచి కోలుకున్నారు. కొవిడ్ విపరీతంగా పెరుగుతున్న నేపథ్యంలో దేశంలో రోజువారీ పాజిటివిటీ రేటు 10.21 శాతానికి పెరిగినట్లు కేంద్ర ఆరోగ్య శాఖ తెలిపింది.
ఇవీ చూడండి: తక్కువ ధరకే 'మ్యాంగో వైన్'.. ఎక్సైజ్ శాఖ కొత్త ప్లాన్
