Precautions For Ayyappa Swamy Devotees Going To Sabarimala : కార్తీక మాసం ప్రారంభం కావడంతోనే.. లక్షలాదిమంది భక్తులు హరిహర సుతుడు అయ్యప్పస్వామి దీక్షలను ప్రారంభిస్తారు. కఠినమైన నియమాలతో, నిష్ఠలతో 41 రోజుల పాటు భక్తులు మండలదీక్ష చేస్తారు. ఈ సమయంలో.. తెల్లవారు జామునే లేచి చన్నీళ్లతో స్నానం చేయడం, నేలపై నిద్రపోవడం వంటి నియమాలెన్నో పాటిస్తారు. మండలకాలం తర్వాత.. ఇరుముడిని కట్టుకొని శబరిమలకు వెళ్లి మకర జ్యోతిని దర్శించిన తరవాత దీక్ష విరమిస్తారు. ఈ మండలకాలంలో అయ్యప్ప స్వామిని ఆరాధిస్తూనే భక్తులు ఆరోగ్యంగా ఉండటానికి కొన్ని జాగ్రత్తలను తీసుకోవాలని నిపుణులు సూచిస్తున్నారు.
శబరిమల యాత్రకు ముందు..
- మీకు ముందు నుంచే ఏమైనా ఆరోగ్య సమస్యలుంటే వైద్యుల సలహాలు, సూచనలను అడిగి తెలుసుకోండి.
- శబరిమల యాత్రలో ఎత్తైన పర్వత శ్రేణుల్లో కాలినడకన వెళ్లాల్సి ఉంటుంది.
- కాబట్టి, ఒక నెల రోజుల ముందు నుంచే నడకను ప్రారంభించండి.
- పండ్లు, ఆకు కూరలను, రోజువారి ఆహారంలో భాగం చేసుకోండి.
- శరీరానికి తగినంత విశ్రాంతిని అందించండి.
- డయాబెటిస్‌తో బాధపడుతున్న వారు షుగర్‌ లెవెల్స్‌ను ఎప్పటికప్పుడు చెక్‌ చేసుకోవాలి.
- చక్కెర ఉన్న పదార్థాలను తక్కువ మొత్తంలో తీసుకోవాలి.
- 40 సంవత్సరాలు దాటిన భక్తులు మండలదీక్ష సమయంలో మరిన్ని జాగ్రత్తలు తీసుకోవాలని నిపుణులు సూచిస్తున్నారు.
యాత్ర సమయంలో..
- సన్నిధానానికి ఏటవాలుగా ఉన్న కొండను ఎక్కే సమయంలో ప్రతి పది నిమిషాలకు ఒకసారి తప్పనిసరిగా విశ్రాంతి తీసుకోవాలి.
- అనారోగ్య సమస్యలు ఉన్న వారు ఆగుతూ వెళ్లడం మంచిది.
- కొండ ఎక్కే సమయంలో నీళ్లను ఎక్కువగా తాగండి.
- అయిల్‌ ఫుడ్‌, మసాలా పదార్థాలకు దూరంగా ఉండండి.
- ఆస్తమా, సైనస్, శ్వాసకోశ సమస్యలతో బాధపడేవారు తమ వెంట ఇన్‌ హేలర్‌ను తీసుకెళ్లండి.
- బీపీ ఉన్న వారు మాత్రలను వెంట తీసుకెళ్లాలి.
- అవసరమైన మందులు, ప్రథమ చికిత్స కిట్‌ను అందుబాటులో ఉంచుకోండి.
- కొండ ఎక్కే సమయంలో కొంతమంది భక్తులు ఆక్సిజన్‌ అందక ఇబ్బంది పడుతుంటారు.
- ఆ సమయంలో దారిలో అక్కడక్కడా ఉన్న ఆక్సిజన్‌ పార్లర్లు, కార్డియాక్ సెంటర్లను సంప్రదించవచ్చు.
- కొండ ఎక్కుతున్న సమయంలో కళ్లు తిరగడం, నీరసంగా ఉంటే.. ఎక్కడైనా విశ్రాంతి తీసుకోండి.
- రద్దీ రోజుల్లో సన్నిధానంలో బస చేయకపోవడమే మంచిది. స్వామి దర్శనం అనంతరం తక్షణం తిరిగి పంబకు చేరుకోవడం ఉత్తమం.
- ఇరుముడితో పాటు నగదు, వస్తువులు, బ్యాగుల విషయంలో చాలా జాగ్రత్తగా ఉండాలి. పంబ నదిలో స్నానం చేసేటప్పుడు భక్తులు జాగ్రత్తగా ఉండాలి.
యాత్ర అనంతరం..
- శబరిమల నుంచి ఇంటికి తిరిగి వచ్చిన తరవాత తగినంత విశ్రాంతి తీసుకోండి.
- మంచి ఆహారం, పండ్ల రసాలను ఎక్కువగా తీసుకోండి.
- కొన్ని రోజులు శ్రమతో కూడిన పనులను చేయకండి.
- ఏవైనా అనారోగ్య సంకేతాలు కనిపిస్తే వెంటనే వైద్యుడిని సంప్రదించండి.
