Pune power cut today 2022: పిల్లులు ఉండటం వల్ల ఇంట్లో ఎలుకల బెడద తొలగిపోతుందని చాలా మంది నమ్ముతుంటారు. మరికొందరు ఎంతో ఇష్టంగా వాటిని పెంచుకుంటుంటారు. అయితే, ఒక్క పిల్లి వల్ల 60 వేల ఇళ్లకు విద్యుత్ నిలిచిపోయిందంటే నమ్ముతారా? ఇది నిజమే. మహారాష్ట్ర, పుణెలోని పింప్రి చించ్వడ్లో జరిగింది. 60 వేల వినియోగదారులు కరెంట్ కట్తో ఇబ్బంది పడ్డారు. దీంతో ఏడువేల మంది భోసరీ ఎంఐడీసీ వ్యాపారులపై ప్రభావం పడింది. దాని వల్ల వంద కోట్ల రూపాయలకుపైగా నష్టం వచ్చిందని ఆందోళన వ్యక్తం చేశారు.
ఇదీ జరిగింది: పింప్రిలోని మహా ట్రాన్స్మిషన్ సబ్స్టేషన్లోని ట్రాన్స్ఫార్మర్పైకి ఓ పిల్లి ఎక్కింది. షార్ట్సర్క్యూట్తో అది చనిపోయింది. దీని ద్వారా భోసరీ, భోసరీ ఎంఐడీసీ, ఓకుర్ది ప్రాంతాలకు విద్యుత్తు సరఫరా నిలిచిపోయింది. సుమారు 60వేల కుటుంబాలపై ఈ ప్రభావం పడింది. పవర్ కట్పై తీవ్ర ఆందోళన వ్యక్తం చేశారు భోసరీ ఎంఐడీసీ వ్యాపారులు. ఎంఎస్ఈడీసీఎల్ అధికారుల నిర్వహణ లోపమని ఆరోపించారు.
పవర్ కట్ ద్వారా తమ వ్యాపారాలు తీవ్రంగా ప్రభావితమయ్యాయని, సుమారు రూ.100 కోట్ల నష్టం వాటిల్లిందని పింప్రి-చించ్వడ్ సూక్ష్మ పరిశ్రమల సంఘం అధ్యక్షుడు సందీప్ బెల్సేర్ పేర్కొన్నారు. ఈ అంశంపై విద్యుత్తు శాఖ మంత్రి ప్రత్యేక దృష్టి సారించి సమస్యను వీలైనంత తొందరగా తీర్చాలని డిమాండ్ చేశారు. పవర్ కట్ మరో మూడు రోజుల వరకు కొనసాగవచ్చని అధికారవర్గాలు తెలిపాయి. మరోవైపు.. ప్రజలు విద్యుత్తును పొదుపుగా వాడుకోవాలని, ఒకే ట్రాన్స్ఫార్మర్పై లోడ్ మొత్తం పడుతుందని చెప్పారు ఎంఎస్ఈడీసీఎల్ అధికారి జ్యోతి చిప్టే.
- ఇదీ చూడండి: దిల్లీలో ఉగ్రదాడులకు కుట్ర.. పోలీసుల హైఅలర్ట్!
