పట్నా హైకోర్టు ప్రధాన న్యాయమూర్తినంటూ ఓ ఆగంతకుడు బిహార్ డీజీపీకు ఫోన్ చేశాడు. లిక్కర్ మాఫియా కేసులో ఆరోపణలు ఎదుర్కొంటున్న ఓ ఐపీఎస్ ఆఫీసర్కు క్లీన్ చిట్ ఇవ్వాలంటూ పలుసార్లు ఫోన్ చేసి డీజీపీపై ఒత్తిడి తీసుకొచ్చాడు. దీంతో తక్షణమే రంగంలోకి దిగిన అధికారులు అతడిని అరెస్ట్ చేసి అదుపులోకి తీసుకున్నారు.
అసలేం జరిగిందంటే.. గతంలో ఓ లిక్కర్ స్కామ్కు సంబంధించిన కేసులో గయా ప్రాంతానికి చెందిన 2011 బ్యాచ్ సీనియర్ ఐపీఎస్ అధికారి ఎస్ఎస్పీ ఆదిత్య కుమార్ నిందితుడిగా ఉన్నారు. అయితే ఆయనపై గతంలో ఓ లిక్కర్ స్కామ్లో భాగంగా ఫతేపూర్ స్టేషన్లో పలు సెక్షన్ల కింద కేసు నమోదైంది. అయితే ఈ కేసులో ఆదిత్యకు క్లీన్ చిట్ ఇవ్వాలంటూ అభిషేక్ అనే వ్యక్తి.. బిహార్ డీజీపీ ఎస్కే సింఘాల్కు తాను పట్నా హైకోర్టు ప్రధాన న్యాయమూర్తినంటూ పలుమార్లు కాల్స్, మెసేజ్ చేశాడు. వాట్సాప్ ద్వారా కూడా న్యాయమూర్తి డీపీ పెట్టుకుని ఇలా చేశాడు. దీనిని నమ్మిన డీజీపీ.. ఆదిత్యకు క్లీన్ చిట్ ఇచ్చారు.
అయితే ఆ రిపోర్టును పరిశీలించిన సీఎంఓ కార్యాలయం.. ఈ కేసులో ఏదో అవకతవకలు జరిగినట్లు భావించి.. కేసును ఈఓయూకు(ఆర్థిక నేరాల విభాగం) అప్పగించింది. దీంతో రంగంలోకి దిగిన పోలీసులు డీజీపీ ఫోన్ కాల్ డేటా ఆధారంగా అభిషేక్ను పట్టుకున్నారు. అనంతరం ఈ కేసుతో సంబంధం ఉన్న మరో ముగ్గిరిని అదుపులోకి తీసుకున్నారు. అభిషేక్.. డీజీపీపై ఒత్తిడి తీసుకొచ్చిన కారణంగానే ఆదిత్యకు క్లీన్ చిట్ ఇచ్చినట్లు తెలుసుకున్నారు. ఈ విషయాన్ని లా అండ్ ఆర్డర్ అడిషనల్ డీజీపీ జితేంద్ర సింగ్ గంగ్వార్ వెల్లడించారు. అభిషేక్ అగర్వాల్.. గతంలో చీటింగ్ సహా రెండు, మూడు కేసుల్లో నేరస్థుడిగా ఉన్నట్లు తెలిపారు. తీహార్ జైలులో శిక్షను కూడా అనుభవించినట్లు పేర్కొన్నారు. నాలుగేళ్ల నుంచి ఆదిత్యకుమార్.. అభిషేక్కు పరిచయమున్నట్లు వెల్లడించారు. "అభిషేక్ అగర్వాల్, ఆదిత్య కుమార్లపై ఎఫ్ఐఆర్ నమోదు చేశాం. వారితో పాటు గౌరవ్ రాజ్, శుభం కుమార్, రాజుల్ రంజన్ అనే ముగ్గురిని కూడా ఈ కేసులో సహ నిందితులుగా చేర్చాం. నిందితులపై కఠిన చర్యలు తీసుకుంటాం" అని డీజీపీ గంగ్వార్ తెలిపారు. తన ఐపీఎస్ ఫ్రెండ్ను లిక్కర్ కేసు నుంచి బయటకు తీసుకువచ్చేందుకే అభిషేక్ ఈ పని చేశాడని అధికారులు పేర్కొన్నారు.
