WhatsApp group to nab a thief: దొంగలను పట్టుకునేందుకు పోలీసులు.. ఎప్పటికప్పుడు కొత్త ఆలోచనలకు పదును పెడుతున్నారు. సాంకేతికతను ఉపయోగించుకుని ఇట్టే పట్టేస్తున్నారు. కేరళలోని కాసరగొడ్ జిల్లా పోలీసులు మరో మెట్టు ఎక్కి సామాజిక మాధ్యమాలను వినియోగించుకుంటున్నారు. ఓ మహిళను కొట్టి బంగారు ఆభరణాలు ఎత్తుకెళ్లిన దుండగుడిని పట్టుకునేందుకు అతని పేరుపై వాట్సాప్ గ్రూప్ క్రియేట్ చేశారు. అందులో స్థానికులను చేర్చి.. దొంగ సమాచారాన్ని గ్రూప్లో పోస్ట్ చేయాలని సూచించారు.
ఇదీ జరిగింది..
పది రోజుల క్రితం మడిక్కాయ్ గ్రామానికి చెందిన ఓ మహిళపై దాడి చేసి బంగారు ఆభరణాలను ఎత్తుకెళ్లాడు అశోకన్ అనే వ్యక్తి. కేసు నమోదు చేసుకున్న హోస్దుర్గ్ పోలీసులు ఎంత వెతికినా ప్రయోజనం లేకపోయింది. దీంతో వాట్సాప్ గ్రూప్ రూపొందించాలనే సరికొత్త ఆలోచనకు శ్రీకారం చుట్టారు. దొంగ పేరు, ఫొటోతో గ్రూప్ను క్రియేట్ చేసి స్థానికులను అందులో చేర్చారు. ప్రస్తుతం ఈ గ్రూప్లో 251 మంది సభ్యులు ఉన్నారు. పోలీసులతో పాటు గ్రామస్థులు అశోకన్ కోసం గాలిస్తూ ఎప్పటికప్పుడు సమాచారాన్ని గ్రూప్లో షేర్ చేస్తున్నారు.
దొంగతనానికి పాల్పడిన అశోకన్ సన్నిహితుడు మంజునాథన్ను అరెస్ట్ చేశారు పోలీసులు. అయితే, అశోకన్ తప్పించుకుని సమీపంలోని అటవీ ప్రాంతంలోకి వెళ్లి దాక్కున్నాడు. సుమారు 400 ఎకరాల మేర అడవి విస్తరించటం వల్ల అందులోకి వెళ్లి వెతకటం సాధ్యం కాలేదని తెలిపారు పోలీసులు.
ఓ దొంగను పట్టుకునేందుకు వాట్సాప్ గ్రూప్ను రూపొందించటం కేరళ పోలీసు చరిత్రలోనే ఇదే తొలిసారిగా పేర్కొన్నారు అధికారులు.
ఇదీ చూడండి: రాళ్లు రువ్వుకుంటూ 'ఊరంతా' హోలీ.. 48 మందికి గాయాలు
