Modi Uttarakhand Visit: గతంలో కేంద్రం, ఉత్తరాఖండ్లో అధికారంలో ఉన్న కాంగ్రెస్ ప్రభుత్వాలు అభివృద్ధి కార్యక్రమాలు చేపట్టేందుకు ముందడుగు వేయలేదని ప్రధాని నరేంద్ర మోదీ ఆరోపించారు. రాష్ట్ర ప్రగతి కోసం వారెప్పుడూ పని చేయలేదని విమర్శించారు. ఫలితంగా రాష్ట్ర ప్రజలు వలసలు వెళ్లాల్సిన పరిస్థితి ఏర్పడిందని ధ్వజమెత్తారు. ఉత్తరాఖండ్ పర్యటనలో ఉన్న మోదీ.. హల్ద్వానీలో నిర్వహించిన బహిరంగ సభలో ప్రజలను ఉద్దేశించి మాట్లాడారు.
"భాజపా సర్కారుకు ముందు అధికారంలో ఉన్నవారు ప్రాజెక్టును జాప్యం చేయడం పాపం కాదా? మీరు వారి పాపాన్ని మరచిపోతారా?" అని రాష్ట్ర ప్రజలను ప్రశ్నించారు. తమ ప్రభుత్వం అభివృద్ధికి కట్టుబడి ఉందన్నారు. అభివృద్ధే అజెండాగా 'సబ్కా సాత్, సబ్కా వికాస్' నినాదంతో ముందుకెళ్తోందన్నారు.
రూ.17వేల కోట్ల ప్రాజెక్టులకు మోదీ శంకుస్థాపన
ఉత్తరాఖండ్లో పర్యటనలో భాగంగా పలు అభివృద్ధి ప్రాజెక్టులకు మోదీ శ్రీకారం చుట్టారు. వాటిలో రూ.14,127 కోట్ల విలువైన 17 ప్రాజెక్టులకు శంకుస్థాపన చేశారు. మరో రూ.3,420 కోట్ల వ్యయంతో ఇటీవల పూర్తి చేసిన ఆరు ప్రాజెక్టులను ప్రారంభించారు. ఈ ప్రాజెక్టుల ద్వారా మౌలిక సదుపాయాలను మెరుగుపరచునున్నట్లు మోదీ తెలిపారు.
"ఈ అభివృద్ధి ప్రాజెక్టులు హల్ద్వానీ ప్రజలకు మెరుగైన అనుసంధానత, ఆరోగ్యాన్ని అందిస్తాయి. తాగునీరు, రోడ్లు, పార్కింగ్, వీధి దీపాలు సహా హల్ద్వానీలో మౌలిక సదుపాయాల అభివృద్ధి కోసం రూ.2,000 కోట్లతో ఓ పథకాన్ని తీసుకువస్తున్నాం."
- ప్రధాని నరేంద్ర మోదీ
రూ.5,747 కోట్ల విలువైన లఖ్వర్ బహుళ ప్రయోజన జలవిద్యుత్ ప్రాజెక్టు, రూ.500 కోట్లతో కుమావోన్‌కు ఎయిమ్స్ శాటిలైట్ కేంద్రం, మొరాదాబాద్-కాశీపుర్ నాలుగు-లేన్ రహదారి, నేపాల్‌తో మెరుగైన రహదారి కనెక్టివిటీ, కాశీపుర్‌లోని అరోమా పార్క్కు తాజాగా ప్రధాని శంకుస్థాపన చేశారు. వీటితో పాటు చార్‌ధామ్ను కలిపే మూడు వేర్వేరు రోడ్లు, నగీనా-కాశీపుర్ జాతీయ రహదారి, గద్ హైడల్ ప్రాజెక్ట్, నైనిటాల్ వద్ద నమామి గంగే కార్యక్రమం కింద నిర్మించిన డ్రైనేజీ వ్యవస్థను ప్రధాని ప్రారంభించారు.
వచ్చే ఏడాది అసెంబ్లీ ఎన్నికలు జరగనున్న నేపథ్యంలో ఆయా రాష్ట్రాల్లో మోదీ సుడిగాలి పర్యటన చేస్తున్నారు. ఇటీవల రెండు రోజుల పాటు ఉత్తర్ప్రదేశ్లో పర్యటించిన మోదీ.. తాజాగా ఉత్తరాఖండ్ను సందర్శించారు. ఈ నెలలో ఉత్తరాఖండ్ను సందర్శించడం ఇది రెండోసారి.
ఇదీ చూడండి: యూట్యూబ్ చూసి దొంగ నోట్లు ప్రింటింగ్- ఇంజినీర్ అరెస్ట్
