Ganga Expressway: గంగా ఎక్స్ప్రెస్వే ద్వారా యువతకు ఉపాధి సహా ఎన్నో కొత్త అవకాశాలు కలుగుతాయని పేర్కొన్నారు ప్రధాని నరేంద్ర మోదీ. త్వరలోనే అత్యాధునిక మౌలిక వసతులు కలిగిన రాష్ట్రంగా ఉత్తర్ప్రదేశ్ నిలుస్తుందని ఆశాభావం వ్యక్తం చేశారు. ఎక్స్ప్రెస్వేలు, విమానాశ్రయాలు, రైలు మార్గాల నిర్మాణమే అందుకు ఉదాహరణ అని పేర్కొన్నారు. ఉత్తర్ప్రదేశ్ షాజహాన్పుర్లోని గంగా ఎక్స్ప్రెస్వేకు శనివారం శంకుస్థాపన చేశారు మోదీ. ఈ సందర్భంగా ప్రధాని ఈ వ్యాఖ్యలు చేశారు.
"మేరఠ్, హాపుర్, బులంద్ శహర్, అమ్రోహా, సంభాల్, బదౌన్, షాజహాన్పుర్, హర్దోయ్, ఉన్నావ్, రాయ్బరేలీ, ప్రతాప్గఢ్, ప్రయాగ్రాజ్ జిల్లా ప్రజలకు అభినందనలు. రూ.36,000 కోట్లతో నిర్మిస్తున్న ఈ ఎక్స్ప్రెస్వే ద్వారా ఇక్కడి ప్రాంతాల్లో కొత్త పరిశ్రమలు వెలుస్తాయి. అత్యాధునిక మౌలిక వసతులు కలిగిన రాష్ట్రంగా ఉత్తర్ప్రదేశ్ను గుర్తించే రోజు ఎంతో దూరంలో లేదు. ఇక్కడ నిర్మిస్తున్న ఎక్స్ప్రెస్వేలు, విమానాశ్రయాలు, రైలు మార్గాలు ప్రజలకు అరుదైన అవకాశాలను కల్పిస్తాయి."
-నరేంద్ర మోదీ, ప్రధానమంత్రి
Modi Up Development: "వనరులను ఎలా ఉపయోగించాలనేదానికి ఉత్తర్ప్రదేశ్కు తరలివస్తున్న ఆధునిక మౌలిక వసతులే ఉదాహరణ. అంతకుముందు ప్రజాధనాన్ని ఎలా వినియోగించారో మీరు చూశారు. కానీ, ఈ రోజు యూపీ ప్రజల సొమ్మును యూపీ అభివృద్ధి కోసమే వినియోగిస్తున్నాం. గతంలో పెద్ద ప్రాజెక్టులకు కాగితాలకే పరిమితమయ్యాయి" అని మోదీ పేర్కొన్నారు.
'యూపీ ప్లస్ యోగి..'
Pm Modi On Up cm: "గతంలో యూపీలో శాంతి భద్రతలు క్షీణించి ఉండడం వల్ల చాలా మంది రాష్ట్రాన్ని వదలివెళ్లారు. కానీ, గత నాలుగన్నరేళ్లుగా... మాఫియాలు దోచుకున్న ఆస్తులను బుల్డోజర్లు ధ్వంసం చేశాయి. మాఫియాను ఆదరించే వారికి ముచ్చెమటలు పట్టాయి"అని మోదీ పేర్కొన్నారు. ముఖ్యమంత్రి యోగి ఆదిత్యానాథ్ యూపీలో మాఫియాను అరికట్టి, అభివృద్ధి పనులను ముందుకు తీసుకువెళ్లారని ప్రశంసించారు. యూపీకి యోగీతో చాలా ఉపయోగం కలిగిందని పేర్కొన్నారు.
దేశవ్యాప్తంగా రోడ్లను అనుసంధానించాలనే మోదీ లక్ష్యాన్ని స్ఫూర్తిగా తీసుకుని ఈ ప్రాజెక్టు చేపడుతున్నట్లు ప్రధాన మంత్రి కార్యాలయం వెల్లడించింది. 594 కిలోమీటర్ల పొడవు ఉన్న ఈ సిక్స్లేన్ ఎక్స్ప్రెస్వేను రూ.36,200 కోట్లతో నిర్మిస్తున్నారు. ఈ ఎక్స్ప్రెస్వే.. మేరఠ్లోని బిజౌలీ గ్రామంలో ప్రారంభమై ప్రయాగరాజ్లోని జుదాపుర్ దండు గ్రామం వరకు ఉంటుంది. ఈ ఎక్స్ప్రెస్వే వద్దే 3.5 కిలోమీటర్ల ఎయిర్ స్ట్రిప్ను కూడా నిర్మిస్తున్నారు. 2024 నాటికి ఈ ప్రాజెక్టు పూర్తికానుందని అధికారులు అంచనా వేస్తున్నారు.
ఇదీ చూడండి : 'అగ్ని-ప్రైమ్' క్షిపణి ప్రయోగం విజయవంతం
