'మోదీ అజేయుడు.. మన్మోహన్‌ విధేయుడు'

భారత మాజీ రాష్ట్రపతి , దివంగత నేత ప్రణబ్​ ముఖర్జీ తన ఆత్మకథలో ప్రధాని నరేంద్ర మోదీపై ప్రశంసలు కురిపించారు. దేశంలో ఎక్కువమంది కోరుకున్న నాయకుడిగా ఆయన ఎదిగారని పేర్కొన్నారు. మన్మోహన్‌సింగ్‌ విషయానికి వస్తే.. ఆయనకు సోనియాగాంధీ ప్రధాన మంత్రిగా అవకాశం ఇచ్చారని రాసుకొచ్చారు.

'వరుసగా 2014, 2019.. రెండు సాధారణ ఎన్నికల్లోనూ భాజపా నిర్ణయాత్మక విజయాలు అందుకొంది. ప్రజలు రాజకీయ స్థిరత్వాన్ని కోరుకొంటున్నారని చెప్పేందుకు ఇది సంకేతం. నరేంద్ర మోదీ ప్రధానమంత్రి స్థానాన్ని 'సంపాదించి.. సాధించిన' విజేత. దేశంలో ఎక్కువమంది కోరుకున్న నాయకుడిగా ఆయన ఎదిగారు. అదే మన్మోహన్‌సింగ్‌ విషయానికి వస్తే.. ఆయనకు సోనియాగాంధీ ఈ అవకాశం ఇచ్చారు' అని మాజీ రాష్ట్రపతి ప్రణబ్‌ ముఖర్జీ మంగళవారం విడుదలైన తన ఆత్మకథ 'ది ప్రెసిడెన్షియల్‌ ఇయర్స్, 2012 - 2017'లో పేర్కొన్నారు. గతేడాది మృతిచెందిన ప్రణబ్‌ ముఖర్జీ తన మరణానికి కాస్తముందుగా ఈ ఆత్మకథను పూర్తి చేశారు. '2014 ఎన్నికల తీర్పు రెండు కారణాల రీత్యా చరిత్రాత్మకం. మొదటిది.. మూడు దశాబ్దాల తర్వాత ఓ పార్టీ సంపూర్ణ మద్దతుతో నిర్ణయాత్మక విజయం సాధించింది.

నిజమైన విజేత ఓటరే..

ఇక రెండోది.. తొలిసారి భాజపా లోక్‌సభలో కావలసిన మెజారిటీ ఏక పార్టీగా సాధించినా మిత్రపక్షాలతో కలిసి ప్రభుత్వం ఏర్పాటు చేసింది. కానీ, 'నిజమైన విజేత ఎవరంటే స్థిరమైన ప్రభుత్వాన్ని కోరుకొన్న ఓటరే. అభివృద్ధిని కోరుకునే రాజకీయాలకు ఇది సూచిక' అని కాంగ్రెస్‌ వృద్ధనేత తన పుస్తకంలో విశ్లేషించారు. ప్రజలు కూడా సంకీర్ణాలతో అప్పటికే విసిగిపోయారని, దేశంలో సంకీర్ణాల ఏకైక ఎజెండా కేవలం ఒక పార్టీని అధికారంలోకి రాకుండా అడ్డుకోవడమే అన్నట్టు పరిస్థితులు మారాయన్నారు. '2014లో మోదీ ప్రభంజనాన్ని అడ్డుకోవడంలో కాంగ్రెస్‌ పార్టీ ఘోరంగా విఫలమైంది. ఎన్నికల ప్రచారం ముగిసి, సాధారణ పరిస్థితులు నెలకొన్నాక చాలామంది ముఖ్యులైన కాంగ్రెస్‌ నేతలు, మంత్రులు రాష్ట్రపతి భవన్‌లో వివిధ కారణాలతో నన్ను కలిశారు. ఆశ్చర్యం కలిగించిన విషయం ఏమిటంటే.. వారిలో ఒక్కరు కూడా యూపీఏకు స్పష్టమైన మెజారిటీ వస్తుందని చెప్పలేకపోయారు' అని ప్రణబ్‌ దా వివరించారు.

భాజపా విజయాన్ని ఊహించలేదు..

ఈ సారి ఎన్నికల్లో సంకీర్ణాలకు కాకుండా.. ఏదో ఒక పార్టీకి స్పష్టమైన మెజారిటీ ఇవ్వాలంటూ 2014 రిపబ్లిక్‌ డే వేడుకల్లో తాను చేసిన ప్రసంగం గుర్తు చేసుకొంటూ 'కావచ్చు.. ఓటర్లు నా మాట విని ఆ అవకాశం నరేంద్ర మోదీకి ఇచ్చారని ప్రజలు చెప్పవచ్చు' అన్నారు. తాను కూడా భాజపాకు ఈ స్థాయి విజయాన్ని ఊహించలేదని, కానీ మోదీ శ్రమించిన తీరు, ఆయన ప్రణాళికలు చూసి ప్రభావితం అయ్యానంటూ రాసుకొచ్చారు. అప్పట్లో భాజపా జాతీయ కోశాధికారిగా ఉన్న పీయూష్‌ గోయల్‌ ఒక్కరే 265 స్థానాలకు తక్కువ కాకుండా వస్తాయని గట్టిగా చెప్పారని, ఆ సంఖ్య 280 దాటిందన్నారు. ఆయన అంత కచ్చితంగా ఎలా చెప్పగలిగారన్నది తనకు ఇప్పటికీ (పుస్తకం రాసే సమయం దాకా) అర్థం కాని విషయమే అన్నారు. 'నరేంద్ర మోదీ విదేశీ వ్యవహారాల్లో గతంలో మరే ఇతర ప్రధానమంత్రులూ సాధించలేని విజయాలు సాధించారు. ఆయన చూపించే చొరవ ఈ విజయాలకు దోహదం చేసింది' అంటూ ప్రణబ్‌ ముఖర్జీ తన ఆత్మకథలో వెల్లడించారు.

ఇదీ చూడండి:'కాంగ్రెస్​కు ఆకర్షణీయ నేతలు కరవు'