PM Modi: ఉక్రెయిన్ సంక్షోభం సహా పలు అంశాలపై రాష్ట్రపతి రామ్నాథ్ కోవింద్ను కలిసి స్వయంగా వివరించారు ప్రధాని నరేంద్ర మోదీ. 'ఆపరేషన్ గంగ' పేరిట ఉక్రెయిన్లో చిక్కుకున్న భారత పౌరులను స్వదేశానికి రప్పిస్తోంది కేంద్ర ప్రభుత్వం. వారిలో ఎక్కువ మంది విద్యార్థులే ఉన్నారు. ఈ తరలింపు ప్రక్రియలో తాము చేపడుతున్న చర్యల గురించి రాష్ట్రపతికి మోదీ వివరించినట్లు విశ్వసనీయ వర్గాలు తెలిపాయి.
మోదీ సమక్షంలో రాష్ట్రపతి భవన్లో మంగళవారం ఆరోగ్య వనాన్ని ప్రారంభించారు కోవింద్. ఆయుర్వేద మొక్కల ప్రాముఖ్యత, మానవ అవయవాలపై వాటి ప్రభావం గురించి అవగాహన, ప్రచారం కల్పించే ఉద్దేశంతో దీనిని రూపొందించారు. దానిని ప్రజల సందర్శనకు పెట్టారు.
రంగంలోకి వాయుసేన..
ఉక్రెయిన్లో చిక్కుకున్న భారతీయులను స్వదేశానికి తీసుకువచ్చేందుకు ఏర్పాటు చేసిన ఆపరేషన్ గంగను వేగవంతం చేసేందుకు వాయుసేన రంగంలోకి దిగనున్నట్లు తెలుస్తోంది. ఈ మేరకు ప్రధాని నరేంద్ర మోదీ ఆదేశాలు జారీ చేసినట్లు సమాచారం.
వాయుసేనకు చెందిన సీ-17 ఎయిర్ క్రాఫ్ట్ను ఇందుకు వినియోగించనున్నారు. దీని ద్వారా తక్కువ సమయంలో మరింత మందిని తరలించేందుకు వీలవుతుందని ప్రభుత్వ వర్గాలు వెల్లడించాయి.
తక్షణమే కీవ్ను వీడండి..
ఉక్రెయిన్ రాజధాని కీవ్లోని భారత పౌరులు.. తక్షణమే ఆ నగరాన్ని విడిచివెళ్లాలని సూచించింది కేంద్ర ప్రభుత్వం. అందుబాటులో ఉన్న రైళ్లు, ఇతర సౌకర్యాలతో కీవ్ను ఖాళీ చేయాలని స్పష్టం చేసింది.
కీవ్ లక్ష్యంగా రష్యా దూకుడు పెంచింది. 65 కిలోమీటర్ల మేర సాయుధ కాన్వాయ్ను మోహరించింది. ఈ నేపథ్యంలోనే కేంద్రం కీలక సూచనలు చేసింది.
మరో 182 మంది భారత్కు..
182 మంది భారతీయులతో ఏడో విమానం రొమేనియా రాజధాని బుకారెస్ట్ నుంచి సోమవారం బయలుదేరిన విమానం ఈ ఉదయం ముంబయి చేరుకుంది. మరో రెండు విమానాలు కూడా అక్కడి నుంచి బయలుదేరడానికి సిద్ధంగా ఉన్నట్లు తెలుస్తోంది. ఇప్పటివరకు 6 విమానాల్లో 1396 మందిని స్వదేశానికి తీసుకొచ్చారు.
మనమే ముందున్నాము..
ఉక్రెయిన్లో చిక్కుకున్న పౌరులను స్వదేశానికి తరలించే ప్రక్రియలో అన్ని దేశాలతో పోలిస్తే భారత్ చురుకుగా పనిచేస్తోందని కేంద్ర ప్రభుత్వం తెలిపింది. ప్రతిపక్షాల విమర్శల నేపథ్యంలో ఈ మేరకు బదులిచ్చింది. "పౌరుల తరలింపు ప్రక్రిను చైనా వాయిదా వేసింది. అమెరికా కూడా తమ పౌరులను తరలించలేమని ప్రకటించింది. అయినా ఆపరేషన్ గంగ నిరంతరంగా కొనసాగుతోంది." అని ప్రభుత్వ వర్గాలు పేర్కోన్నాయి.
ఉక్రెయిన్-రష్యా యుద్ధంపై భారత్ ఆందోళన
ఉక్రెయిన్-రష్యా యుద్ధంపై భారత్ ఆందోళన వ్యక్తం చేసింది. తక్షణమే దాడులకు ముగింపు పలకాలని.. చర్చల ద్వారానే విభేదాలకు పరిష్కారం లభిస్తుందని పేర్కొంది. సోమవారం జరిగిన ఐక్యరాజ్య సమితి సర్వప్రతినిధి సభలో భారత్ తరపున పాల్గొన్న ప్రతినిధి టీఎస్ తిరుమూర్తి ఈ మేరకు వ్యాఖ్యానించారు. దౌత్య మార్గం ద్వారానే సమస్యలకు పరిష్కారం లభిస్తుందని భారత ప్రభుత్వం విశ్వసిస్తుందని పేర్కొన్నారు.
ఇదీ చూడండి: మోదీ వరుస భేటీలు.. ఉక్రెయిన్ పొరుగుదేశాలకు కేంద్ర మంత్రులు
