కేరళలో వరుసగా రెండోసారి అధికారం చేపట్టనున్న సీపీఎం సంచలన నిర్ణయం తీసుకుంది. ముఖ్యమంత్రి పినరయి విజయన్ మినహా నూతన కేబినెట్లో పాతవాళ్లెవరికీ చోటు కల్పించలేదు. కొవిడ్ కట్టడి చర్యలతో ప్రాచుర్యంలోకి వచ్చిన ఆరోగ్య మంత్రి కేకే శైలజకూ ఈసారి అవకాశం దక్కలేదు. ఆమె ఇకపై పార్టీ విప్గా వ్యవహరించనున్నారు.
ఈ విషయంలో సీఎం విజయన్ మినహా ఎవరికీ మినహాయింపు ఇవ్వరాదని సీపీఎం రాష్ట్ర కమిటీ నిర్ణయించింది. ఈ నిర్ణయాన్ని కొడియేరి బాలకృష్ణణ్ ప్రతిపాదించారు.
కొత్తనీరు..
సీపీఎం రాష్ట్ర కార్యదర్శి సభ్యులు కే రాధాకృష్ణణ్, ఎంవీ గోవిందన్, పీ రాజీవన్, కేఎన్ బాలగోపాల్తో పాటు రాష్ట్ర కమిటీ సభ్యులు సాజి చేరియన్, వీఎన్ వాసవన్, వీ శివన్ కుట్టి, మహ్మద్ రియాజ్కు నూతన ఎల్డీఎఫ్ ప్రభుత్వంలో మంత్రి పదవులు దక్కాయి. మహిళా ఎమ్మెల్యేలు వీణా జార్జి, ఆర్ బిందుకు కేబినెట్లో చోటు లభించింది.
తానూర్ ఎమ్మెల్యే వీ అబ్దుల్ రహ్మాన్కూ నూతన మంత్రివర్గంలో స్థానం దక్కింది. థ్రితల ఎమ్మెల్యే ఎంబీ రాజేశ్ స్పీకర్గా వ్యవహరించనున్నారు. అభ్యర్థులను ఎంపిక చేసే ప్రక్రియలో అనుసరించే.. 'కొత్త తరానికి అవకాశం' వ్యూహాన్నే ఇక్కడా అమలుచేసింది సీపీఎం.
సీపీఐ నుంచి ప్రసాద్, రాజన్, చించురాణి, జీఆర్ అనిల్కు కేబినెట్ లో చోటుదక్కింది.
ఇదీ చూడండి: కేరళ సీఎం ప్రమాణ స్వీకారానికి అడ్డంకులు!
