తమిళనాడు శాసనసభ ఎన్నికల ఫలితాల్లో హంగ్ ఏర్పడకుండా చూడాలని అక్కడి ఓటర్లను కోరారు మక్కల్ నీది మయ్యం(ఎంఎన్ఎం) అధినేత కమల్ హాసన్.
"ఆ రెండు పార్టీలు(ఏఐఏడీఎంకే, డీఎంకే) ప్రజల మద్దతు పొందేందుకు అర్హమైనవి కావు. ప్రజలు నిర్ణయాత్మకంగా వ్యవహరించాలి. హంగ్ ఏర్పడకుండా చూడాలి. అందరూ ఓటు హక్కు వినియోగించుకోవాలి.
నేను పేదల ఉన్నతి కోసం పని చేయాలనుకుంటున్నా. రాజ్యాంగానికి, ప్రజలకు సేవ చేసే అవకాశాన్ని దక్కించుకోవడమే నా లక్ష్యం."
- కమల్ హాసన్, ఎంఎన్ఎం అధినేత
ఆ స్థానం నుంచే పోటీ ఎందుకంటే.?
కోయంబత్తూర్‌ను తమిళనాడులోనే కాకుండా దేశంలోనే ఉత్తమ నగరంగా తయారు చేయడానికి కృషి చేస్తానన్నారు కమల్. దక్షిణ కోయంబత్తూర్ నియోజకవర్గం నుంచి బరిలోకి దిగిన ఆయన.. నిజాయితీయే తన పార్టీ వ్యూహమని, ఇతర పార్టీల్లో అది లేదన్నారు. కోయంబత్తూర్ నుంచి పోటీ చేయడానికి కారణమేంటని ప్రశ్నించగా.. తనకు ఆ ప్రాంతంతో దగ్గర సంబంధం ఉందని, అక్కడ చాలా మంది స్నేహితులున్నారని పేర్కొన్నారు. తన జీవితంలోని అనేక కీలక ఘట్టాలకు కోయంబత్తూర్ వేదికైందని చెప్పారు.
తమిళనాడు అసెంబ్లీ ఎన్నికల్లో ఆల్ ఇండియా సమథువ మక్కల్ కట్చి(ఏఐఎస్ఎంకే), ఇండియా జననాయగ కట్చి(ఐజేకే)తో కలసి కూటమిగా పోటీ చేస్తోంది కమల్ పార్టీ. 234 స్థానాలకు గానూ 154 చోట్ల అభ్యర్థులను బరిలోకి దింపుతోంది. మిగతా 80 స్థానాల్లో మిత్ర పక్షాలకు చెరో 40 సీట్లు కేటాయించింది.
ఇదీ చూడండి: అసెంబ్లీ ఎన్నికల్లో విజయం ఎవరిది?
