మధ్యప్రదేశ్లోని సీధీ జిల్లా పట్నా గ్రామం వద్ద మంగళవారం జరిగిన ఘోర రోడ్డు ప్రమాదంలో పదుల సంఖ్యలో ప్రాణాలు కోల్పోయారు.
54 మంది ప్రయాణికులతో సత్నా వెళ్తున్న బస్సు ఉదయం సుమారు 8.30 గంటల సమయంలో అదుపు తప్పి సమీపంలోని బాణసాగర్ కాలువలోకి దూసుకెళ్లింది. మొత్తం 47 మృతదేహాలను వెలికితీశారు. సహాయక చర్యలు ముగిసినట్లు ప్రకటించారు ముఖ్యమంత్రి శివరాజ్ సింగ్ చౌహాన్.
క్రేన్ల సాయంతో..
ప్రమాదం జరిగిన సమయంలో అక్కడే ఉన్న పలువురు ఈ ఘటనపై స్పందిస్తూ కాలువలోకి దూసుకెళ్లిన బస్సు జాడ ఆ తర్వాత ఎక్కడా కనిపించలేదని ఆందోళన వ్యక్తం చేశారు. బస్సు కాలువలో కొట్టుకుపోయి ఉండొచ్చని భావించారు. కానీ అధికారులు అతికష్టం మీద బస్సును గుర్తించారు. కాలువ ఎగువ నీటి ప్రవాహం అదుపు చేసిన తర్వాత బస్సు ఘటనా స్థలానికి కొంత దూరంలో ఉన్నట్లు కనుగొన్నారు. దానిని క్రేన్ల సాయంతో బయటకు తీశారు.
రాష్ట్రపతి, ప్రధాని, ఉపరాష్ట్రపతి విచారం..
ఈ విషాద ఘటనపై రాష్ట్రపతి రామ్నాథ్ కోవింద్, ప్రధానమంత్రి నరేంద్ర మోదీ, ఉపరాష్ట్రపతి వెంకయ్యనాయుడు తీవ్ర విచారం వ్యక్తం చేశారు. మృతుల కుటుంబ సభ్యులకు ప్రగాఢ సానుభూతి తెలిపారు. క్షతగాత్రులు త్వరగా కోలుకోవాలని ఆకాంక్షించారు.
ఈ ఘటనలో మృతులకు ప్రధాని నరేంద్ర మోదీ రూ.2 లక్షలు, తీవ్ర గాయాలపాలైన వారికి రూ.50వేలు చొప్పున పరిహారం ప్రకటించారు.
బస్సు ప్రమాదం తనను బాధించిందని కేంద్ర హోంమంత్రి అమిత్ షా ట్వీట్‌ చేశారు. మధ్యప్రదేశ్ సీఎం శివరాజ్‌సింగ్ చౌహాన్‌కు ఫోన్‌ చేసినట్టు తెలిపారు. మృతుల కుటుంబ సభ్యులకు ప్రగాఢ సానుభూతి వ్యక్తం చేశారు.
దుర్ఘటనపై స్పందించిన రాష్ట్ర ముఖ్యమంత్రి శివరాజ్ సింగ్ చౌహాన్.. ప్రమాదంలో మృతి చెందిన వారికి సంతాపం తెలిపారు.
"జిల్లా కలెక్టర్ నుంచి ఎప్పటికప్పుడు సమాచారం తెలుసుకుంటున్నాను. మృతుల కుటుంబాలకు ప్రభుత్వం రూ.5 లక్షల నష్ట పరిహారం అందిస్తుంది."
-శివరాజ్ సింగ్ చౌహాన్, మధ్యప్రదేశ్ ముఖ్యమంత్రి
వాయిదా..
ఘటనకు సంతాపంగా మంగళవారం జరగాల్సిన కార్యక్రమాల్ని ముఖ్యమంత్రి వాయిదా వేశారు. కేంద్ర హోంమంత్రి అమిత్ షా వర్చువల్గా హాజరుకావాల్సిన 'ప్రధాన మంత్రి ఆవాస్ యోజన ఇళ్ల గృహప్రవేశ్ కార్యక్రమం' కూడా ఈ జాబితాలో ఉంది.
ఇదీ చదవండి : భారత అంతర్గత వ్యవహారాల్లో పాక్ మళ్లీ జోక్యం!
