విపక్షాల ఆందోళనలు- 5 గంటల వరకు రాజ్యసభ వాయిదా - పార్లమెంట్ సమావేశాలు

PARLIAMENT MONSOON SESSION LIVE UPDATES

Published : Dec 20, 2021, 10:58 AM IST

Updated : Dec 20, 2021, 4:31 PM IST

16:30 December 20

రాజ్యసభ వాయిదా..

విపక్షాల ఆందోళనల మధ్య రాజ్యసభ 5 గంటల వరకు వాయిదా పడింది. సమాజ్వాదీ పార్టీ ఎంపీ జయా బచ్చన్, ట్రెజరీ బెంచ్ మధ్య వాగ్వాదంతో వివాదం తలెత్తింది. లఖింపుర్ ఖేరి ఘటన సహా ఇతర అంశాలపై విపక్షాల నిరసనల మధ్యే పలు ప్రశ్నలకు సమాధానమిచ్చారు కేంద్ర ఆరోగ్య శాఖ మంత్రి మాన్సుఖ్ మాండవియా.

88 శాతం మందికి తొలిడోసు..

ప్రధానమంత్రి నరేంద్రమోదీ నాయకత్వం, ఆరోగ్య కార్యకర్తల కృషితో దేశంలో 88 శాతం మందికి తొలిడోసు పూర్తయినట్లు తెలిపారు కేంద్ర వైద్య, ఆరోగ్య శాఖ మంత్రి మాన్సుఖ్ మాండవియా. 58 శాతం మంది రెండు డోసులు తీసుకున్నట్లు చెప్పారు. దేశంలో మెజారిటీ ప్రజలు టీకా తీసుకున్నట్లు తెలిపారు. దేశంలోని రాష్ట్రాలు, కేంద్ర పాలిత ప్రాంతాల వద్ద 17 కోట్ల డోసులు అందుబాటులు ఉన్నాయన్నారు. తయారీ సామర్థ్యం పెంచామన్నారు. ప్రస్తుతం నెలకు 31 కోట్ల డోసులు తయారు చేస్తుండగా.. వచ్చే 2 నెలల్లో 45 కోట్ల డోసులకు పెంచుతున్నట్లు స్పష్టం చేశారు.

దేశంలో 161 ఒమిక్రాన్ కేసులు

దేశంలో ప్రస్తుతం 161 ఒమిక్రాన్ కేసులు ఉన్నట్లు చెప్పారు కేంద్ర మంత్రి. పరిస్థితులను నిశితంగా పరిశీలిస్తున్నామన్నారు. తొలి, రెండో దశ ఉద్ధృతి అనుభవంతో అన్ని చర్యలు తీసుకుంటున్నట్లు చెప్పారు.

15:25 December 20

లోక్సభ రేపటికి వాయిదా

ఓటరు ఐడీని ఆధార్‌తో అనుసంధానం చేసే బిల్లును లోక్సభ ఆమోదించింది. విపక్షాలు లఖింపూర్ ఖేరి ఘటనపై ఆందోళనలు చేస్తుండగానే.. సభలో బిల్లును ప్రవేశపెట్టింది అధికారపక్షం. అనంతరం బిల్లును సభ అమోదించిది. అయితే ఆందోళనలు ఎంతకీ ఆగకపోవడం వల్ల సభను రేపు ఉదయం 11గంటలకు వాయిదా వేశారు.

14:42 December 20

లోక్సభ వాయిదా

లోక్సభ మధ్యాహ్నం 2.45 వరకు వాయిదా పడింది. లఖింపూర్ ఖేరి ఘటనలపై విపక్షాల ఆందోళనల నేపథ్యంలో సభలో గందరగోలం నెలకొంది. ఈ నేపథ్యంలో సభ వాయిదా పడింది.

14:06 December 20

రాజ్యసభ మరోసారి వాయిదా పడింది. మధ్యాహ్నం 2 గంటలకు సమావేశమైన పెద్దల సభలో.. విపక్ష సభ్యుల ఆందోళనలు కొనసాగాయి. ఒమిక్రాన్ వేరియంట్పై చర్చ ప్రారంభించినప్పటికీ.. సభ్యుల నినాదాలు మిన్నంటడం వల్ల.. మధ్యాహ్నం 3 గంటలకు వాయిదా వేస్తున్నట్లు సభాపతి ప్రకటించారు.

13:56 December 20

తప్పును గ్రహించండి: గోయల్

సస్పెన్షన్కు గురైన రాజ్యసభ ఎంపీలు తమ తప్పును గ్రహించి, సభాపతితో మాట్లాడాలని కేంద్ర మంత్రి, భాజపా నేత పీయూష్ గోయల్ పేర్కొన్నారు. ప్రభుత్వం పిలుపునిచ్చిన సమావేశానికి విపక్ష నేతలు హాజరు కాలేదని తెలిపారు. పార్లమెంట్ సజావుగా నడిచేందుకు విపక్షాలు సహకరించడం లేదని, అంతరాయాలు కల్పించడమే వారి అజెండా అని ఎద్దేవా చేశారు.

12:16 December 20

ఆధార్- ఓటర్ అనుసంధానం బిల్లు లోక్సభలో ప్రవేశపెట్టింది కేంద్రం. విపక్షాల నిరసనల మధ్యే దీనిపై సభలో చర్చ జరిగింది.

ఈ బిల్లును విపక్షాలు తీవ్రంగా వ్యతిరేకించాయి. ఇది గోప్యతా హక్కుకు భంగం కలిగిస్తుందని కాంగ్రెస్ ఎంపీ మనీశ్ తివారీ వ్యాఖ్యానించారు. సుప్రీంకోర్టు తీర్పునకు ఇది వ్యతిరేకంగా ఉందని ఎంఐఎం అధినేత, హైదరాబాద్ ఎంపీ అసదుద్దీన్ ఒవైసీ పేర్కొన్నారు. ఆధార్ కార్డు కేవలం దేశంలో నివాసితులకు జారీ చేస్తారని, కానీ ఓటర్ కార్డు భారత పౌరులకు మాత్రమే ఇస్తారని కాంగ్రెస్ ఎంపీ శశిథరూర్ తెలిపారు. కాబట్టి, ఓటర్ కార్డు కోసం ఆధార్ కార్డును చూపాలనడం సరికాదని వివరించారు.

అయితే, విపక్షాల వాదనలను కేంద్రం ఖండించింది. ఎన్నికల ప్రక్రియను విశ్వసనీయంగా ఉంచాల్సిన అవసరం ఉందని కేంద్ర మంత్రి కిరెన్ రిజిజు పేర్కొన్నారు. బోగస్ ఓట్లను నిర్మూలించేందుకే ఈ బిల్లును తీసుకొస్తున్నట్లు తెలిపారు. లోక్సభలో బిల్లు ప్రవేశపెట్టేందుకు రిజిజు అనుమతి కోరగా.. సభ్యులు అంగీకారం తెలిపారు. అనంతరం మధ్యాహ్నం రెండు గంటలకు సభ వాయిదా పడింది.

11:54 December 20

లోక్సభ వాయిదా

విపక్షాల నిరసనలతో లోక్సభ సైతం వాయిదా పడింది. మధ్యాహ్నం 12 గంటలకు సభ తిరిగి సమావేశం కానుంది.

11:47 December 20

విపక్షాల ర్యాలీ

కేంద్ర హోంశాఖ సహాయ మంత్రి అజయ్ కుమార్ మిశ్ర రాజీనామా చేయాలని డిమాండ్ చేస్తూ విపక్ష ఎంపీలు.. ర్యాలీ నిర్వహించనున్నారు. మధ్యాహ్నం 12.30 గంటలకు పార్లమెంట్ ఆవరణలోని గాంధీ విగ్రహం నుంచి విజయ్ చౌక్ వరకు ర్యాలీగా వెళ్లనున్నారు.

11:18 December 20

రాజ్యసభ వాయిదా

విపక్షాలు తమ నిరసనలు కొనసాగించడం వల్ల.. ఎలాంటి కార్యకలాపాలు చేపట్టకుండానే రాజ్యసభ వాయిదా పడింది. మధ్యాహ్నం 2 గంటలకు తిరిగి సమావేశం కానున్నట్లు సభాపతి ప్రకటించారు.

11:01 December 20

'సభలను పనిచేయనివ్వం'

రాజ్యసభలో విపక్ష నేత మల్లికార్జున ఖర్గే ఛాంబర్లో విపక్ష నేతలు భేటీ అయ్యారు. సస్పెన్షన్పై ప్రభుత్వం పిలిచిన చర్చలకు హాజరయ్యేది లేదని తేల్చి చెప్పారు. కేంద్ర మంత్రి అజయ్ కుమార్ మిశ్ర రాజీనామా చేయాలని శివసేన ఎంపీ సంజయ్ రౌత్ డిమాండ్ చేశారు. ఈ విషయంపై పార్లమెంట్లో ప్రస్తావిస్తూనే ఉంటామని వెల్లడించారు. ఉభయ సభలు సక్రమంగా పనిచేయనివ్వమని అన్నారు.

10:49 December 20

పార్లమెంట్ లైవ్ అప్డేట్స్

5 రాష్ట్రాల అసెంబ్లీ ఎన్నికలకు ముందు ఎన్నికల సంస్కరణలకు సంబంధించి కేంద్ర ప్రభుత్వం కీలక ముందడుగు వేసింది. ఓటరు ఐడీని ఆధార్‌తో అనుసంధానం చేసే బిల్లును పార్లమెంటు ముందుకు తీసుకురానుంది. గతవారం కేంద్ర క్యాబినెట్లో ఈ బిల్లును ఆమోదించిన కేంద్రం.. లోక్‌సభలో ఇవాళ ప్రవేశపెట్టనుంది.

ఎన్నికల చట్ట (సవరణ) 2021 పేరుతో.. బిల్లు పెట్టనున్న కేంద్రం.
ఓటరు జాబితాలో పేర్లను నమోదు చేసుకోవాలనుకునే వారి గుర్తింపు పత్రంగా ఆధార్ నంబర్‌ను అడిగే హక్కు ఎన్నికల నమోదు అధికారులకు ఉండేలా చట్టంలో మార్పులు
బిల్లును లోక్సభలో ప్రవేశపెట్టనున్న కేంద్ర న్యాయ శాఖ మంత్రి కిరెన్ రిజిజు.

విపక్షాల చర్చ

ఉదయం 9.30గం.లకు రాజ్యసభలో ప్రతిపక్ష నేత మల్లిఖార్జున ఖర్గే ఛాంబర్లో భేటీ కానున్న విపక్షాలు.
నేటి నుంచి 23 వరకు పార్లమెంటులో అనుసరించాల్సిన వ్యూహంపై చర్చ
12 మంది రాజ్యసభ సభ్యులపై సస్పెన్షన్ ఎత్తి వేయాలని నిరసన కొనసాగిస్తున్న విపక్షాలు
చర్చలకు రావాలని కొన్ని పార్టీలకు మాత్రమే ఆహ్వానం పాలకడంపై ఆగ్రహం వ్యక్తం చేస్తున్న విపక్ష నేతలు

ఇదీ చదవండి: ఎంపీల సస్పెన్షన్పై చర్చకు కేంద్రం ఆహ్వానం.. కానీ