Omicron cases in India: దేశంలో ఒమిక్రాన్ వేరియంట్ వేగంగా విస్తరిస్తోంది. రాజస్థాన్లో కొత్తగా 21 ఒమిక్రాన్ కేసులు వెలుగు చూశాయి. దీంతో రాష్ట్రంలో కొత్త వేరియంట్ కేసుల సంఖ్య 43కు చేరింది. కొత్త కేసుల్లో జైపుర్లో 11, అజ్మేర్లో 6, ఉదయ్పుర్లో 3, మహారాష్ట్ర నుంచి వచ్చిన ఓ వ్యక్తికి వైరస్ సోకింది. వైరస్ బారిన పడిన వారిలో ఐదుగురు విదేశాల నుంచి రాగా.. వారితో కలిసిన ముగ్గురికి వైరస్ పాజిటివ్గా తేలింది.
దిల్లీలో 12 కేసులు
దేశ రాజధానిలో కొవిడ్-19, ఒమిక్రాన్ కేసులు క్రమంగా పెరుగుతున్నాయి. కొత్తగా 12 మందికి ఒమిక్రాన్ పాజిటివ్గా తేలింది. దీంతో దిల్లీలో మొత్తం ఒమిక్రాన్ కేసుల సంఖ్య 79కి చేరింది. అందులో 23 మంది వైరస్ను జయించారు.
కేరళలో 8
కేరళలో శుక్రవారం మరో 8 ఒమిక్రాన్ కేసులు నమోదయ్యాయి. దీంతో రాష్ట్రంలో కొత్త వేరియంట్ కేసుల సంఖ్య 37కు చేరినట్లు ఆరోగ్య మంత్రి వీనా జార్జ్ తెలిపారు. తిరువనంతపురమ్, కొల్లాంలో ఒక్కొక్కరు, అలప్పూజా, ఎర్నాకులం, త్రిస్సూర్ జిల్లాల్లో ఇద్దరి చొప్పున వైరస్ సోకినట్లు వెల్లడించారు. రాష్ట్రంలో వైరస్ సోకిన తొలి వ్యక్తి కోలుకున్నారని తెలిపారు.
దేశంలో 436కు చేరిన సంఖ్య
మూడు రాష్ట్రాల్లో కొత్తగా 41 ఒమిక్రాన్ కేసులు వెలుగు చూసిన క్రమంలో దేశంలో మొత్తం కేసుల సంఖ్య 436కు చేరింది. మొత్తంగా 17 రాష్ట్రాలు, కేంద్రపాలిత ప్రాంతాల్లో కొత్త వేరియంట్ కేసులు బయటపడ్డాయి. మహారాష్ట్రలో అత్యధికంగా 108 మంది ఒమిక్రాన్ బారినపడగా.. ఆ తర్వాత దిల్లీలో 79, గుజరాత్- 43, రాజస్థాన్- 43, తెలంగాణ- 38, కేరళ- 37, తమిళనాడు- 34, కర్ణాటక- 31 కేసులు వచ్చాయి.
దేశంలో ఇప్పటివరకు 115 మంది ఒమిక్రాన్ను జయించారు.
వైద్య కళాశాలలో వైరస్ కలకలం
కర్ణాటక, కోలార్లోని వైద్య కళాశాలలో కొవిడ్-19 కలకలం సృష్టించింది. 33 మంది వైద్య విద్యార్థులకు కరోనా పాజిటివ్గా తేలినట్లు జిల్లా అధికారులు తెలిపారు. ఆసుపత్రిలోనే విద్యార్థులందరిని ఐసోలేషన్కు పంపించినట్లు చెప్పారు.
ఒకే స్కూల్లో 19 మంది..
మహారాష్ట్ర అహ్మద్నగర్లోని జవహర్ నవోదయ విద్యాలయ పాఠశాలలో 19 మంది విద్యార్థులు కరోనా బారినపడ్డారు.
రాష్ట్రంలో ఒమిక్రాన్ కేసుల సంఖ్య ఇప్పటికే 100 దాటింది.
త్రిపురలో ఆంక్షలు..
ఒమిక్రాన్ విస్తరిస్తున్న నేపథ్యంలో కఠిన ఆంక్షలు విధించాలని కేంద్రం సూచించింది. ఈ క్రమంలో ఆంక్షలు విధించే అంశంపై ఆలోచన చేస్తోంది త్రిపుర ప్రభుత్వం. అయితే రాష్ట్రంలో ఇప్పటి వరకు ఒక్క ఒమిక్రాన్ కేసు కూడా నమోదు కాలేదు. దీంతో ఆంక్షలపై తర్జనాభర్జనలో ఉంది ప్రభుత్వం. మంత్రులు, రాష్ట్ర ప్రధాన కార్యదర్శి, ఇతర ఉన్నతాధికారులతో ముఖ్యమంత్రి బిప్లబ్ కుమార్ దేవ్ సమావేశమైనట్లు సాంస్కృతి వ్యవహారాల మంత్రి సుసాంత చౌందరి తెలిపారు. రాష్ట్రంలో ఒమిక్రాన్ కేసు నమోదు కానందున భయాందోళనలు అవసరం లేదన్నారు. విదేశాల నుంచి 69 మంది రాష్ట్రానికి రాగా.. 33 మంది నమూనాలు జినోమ్ సీక్వెన్సింగ్కు పంపించామని, 31 మందికి నెగెటివ్ వచ్చినట్లు చెప్పారు. మరో ఇద్దరి ఫలితాలు రావాల్సి ఉందన్నారు. కరోనా జాగ్రత్తలు తప్పక పాటించాలని సూచించారు. జనవరి 1 నుంచి ఆంక్షలు విధించే అవకాశం ఉందన్నారు.
తమిళనాడుకు డబ్ల్యూహెచ్ఓ హెచ్చరిక..
ఒమిక్రాన్ కేసుల్లో ఒక్కసారిగా పెరుగుదల నమోదయ్యే అవకాశం ఉన్నట్లు తమిళనాడు ఆరోగ్య శాఖను హెచ్చిరంచారు ప్రపంచ ఆరోగ్య సంస్థ ప్రముఖ శాస్త్రవేత్త సౌమ్య స్వామినాథన్ సహా పలువురు నిపుణులు. పండగల సీజన్లో జాగ్రత్తలు పాటించకపోవటం, అవసరమైన స్థాయిలో వ్యాక్సిన్లు లేకపవటం అందుకు కారణం కావచ్చన్నారు. రాష్ట్ర ముఖ్యమంత్రి, ఆరోగ్య మంత్రి, ఉన్నతాధికారులతో వర్చువల్గా సమీక్షించారు స్వామినాథన్. సన్నద్ధమయ్యేందుకు ఒమిక్రాన్ సమయం ఇవ్వదని హెచ్చరించారు. యాంటీబాడీలు, రోగనిరోధక శక్తిని తప్పించుకుని వేగంగా వ్యాప్తిం చెందుతుందని తెలిపారు.
ఇదీ చూడండి:
