మహారాష్ట్రలో రికార్డు స్థాయిలో కేసులు వెలుగుచూస్తూనే ఉన్నాయి. శుక్రవారం మరో 36 వేల 902 మంది వైరస్ బారినపడ్డారు. కరోనా వ్యాప్తి ప్రారంభమైనప్పటినుంచి ఇప్పటివరకు ఒక్కరోజు కేసుల్లో ఇదే అత్యధికం.
రాష్ట్రంలో మొత్తం బాధితుల సంఖ్య 26 లక్షల 37 వేలు దాటింది. 53 వేల 907 మంది ప్రాణాలు కోల్పోయారు.
రాత్రి కర్ఫ్యూ..
కొవిడ్ విజృంభణ నేపథ్యంలో ఉద్ధవ్ సర్కార్ కీలక నిర్ణయం తీసుకుంది. రాష్ట్రవ్యాప్తంగా రాత్రి కర్ఫ్యూ అమలు చేయాలని ముఖ్యమంత్రి.. శుక్రవారం ఆదేశాలు జారీ చేశారు. మార్చి 28 నుంచి ఈ ఆంక్షలు అమలు కానున్నాయి. ఇప్పటికే రాష్ట్రంలోని పలు ప్రాంతాల్లో రాత్రి కర్ఫ్యూ అమల్లో ఉంది.
కరోనా నియంత్రణకు కట్టుదిట్టమైన చర్యలు చేపట్టాలని సీఎం ఆదేశించారు. వైద్య సేవలకు కొరత ఏర్పడుతున్న కారణంగా ఈ నిర్ణయం తీసుకుంటున్నట్లు వెల్లడించారు. నిబంధనలను ఉల్లంఘించిన వారిపై కఠిన చర్యలు తీసుకుంటామని ప్రభుత్వం హెచ్చరించింది. వైరస్ వ్యాప్తి దృష్ట్యా హోలీ పండుగను నిరాడంబరంగా జరుపుకోవాలని స్పష్టం చేసింది.
ఇదీ చదవండి : నిఖితా తోమర్ హత్య కేసు దోషులకు జీవితఖైదు
