NEET PG Exam: నీట్ పీజీ ప్రవేశ పరీక్ష మే 21న నిర్వహించనున్నట్లు జాతీయ పరీక్షల బోర్డు శుక్రవారం తెలిపింది. గతంలో ప్రకటించిన షెడ్యూల్ ప్రకారం ఈ నెల 12న ఈ పరీక్ష జరగాలి. అయితే నీట్ 2021 కౌన్సెలింగ్ ఇదే సమయంలో ఉన్నందున.. పీజీ పరీక్షను 6-8 వారాల పాటు వాయిదా వేయాలని కేంద్ర ప్రభుత్వం గురువారమే పరీక్షల బోర్డును కోరింది. ఈ నేపథ్యంలో తాజా ప్రకటన వెలువడింది.
చివరి తేదీ పొడిగింపు
ఆన్లైన్లోనే నీట్ పరీక్ష దరఖాస్తూ సమర్పించేందుకు ఈనెల 4 వరకు ఉన్న గడువు కూడా మార్చి 25 వరకు పెంచారు. నీట్ పీజీ పరీక్ష మే నాటికి వాయిదా వేయడం వల్ల ప్రస్తుతం ఇంటర్న్షిప్ చేస్తున్న ఎంబీబీఎస్ విద్యార్థులు కూడా ఆ పరీక్షకు హాజరయ్యే అవకాశం వచ్చిందని వైద్య విద్య అసిస్టెంట్ డైరెక్టర్ జనరల్ డాక్టర్ బీ శ్రీనివాస్ చెప్పారు.
నీట్ మాకొద్దంటూ.. డీఎంకే డిమాండ్
నీట్ నుంచి తమిళనాడును మినహాయిస్తూ రాష్ట్ర ప్రభుత్వం చేసిన బిల్లును అక్కడి గవర్నర్ వెనక్కు పంపడంపై డీఎంకే సభ్యులు శుక్రవారం రాజ్యసభలో నిరసన తెలిపారు. వీరికి కాంగ్రెస్, తృణమూల్ కాంగ్రెస్ సభ్యులు మద్దుతు పలికారు. డీఎంకే సభ్యులు ఈ సమస్యను జీరో అవర్లో లేవనెత్తగా.. ఛైర్మన్ ఎం వెంకయ్యనాయుడు తిరస్కరించారు. రాష్ట్రపతి ప్రసంగానికి ధన్యవాదాలు తెలిపే తీర్మానంపై చర్చ సందర్భంగా నీట్ విషయాన్ని ప్రస్తావించుకోవచ్చని ఛైర్మన్ సూచించినా.. సభ్యులు వినిపించుకోలేదు. నిరసన కొనసాగించిన సభ్యులు.. అనంతరం వాకౌట్ చేశారు.
ఇదీ చూడండి: స్టాలిన్‌ దృష్టిని ఆకర్షించిన ఆంధ్రా విద్యార్థి
