Namo Bharat Train : దేశంలో సరికొత్త హైస్పీడ్ రైళ్లు.. వందేభారత్​ను మించేలా 'నమో భారత్!'.. టికెట్ 20 రూపాయలే!

Namo Bharat Train : వందే భారత్‌ ఎక్స్‌ప్రెస్‌ తర్వాత మరో హైస్పీడ్‌ ప్రాంతీయ రైలు పట్టాలెక్కేందుకు రంగం సిద్ధమైంది. ప్రయాణికుల మెరుగైన సేవలందించేందుకు భారతదేశ తొలి ప్రాంతీయ హైస్పీడ్‌ రైలును ప్రధాని నరేంద్ర మోదీ.. రాజధాని ప్రాంతంలో శుక్రవారం ప్రారంభించనున్నారు. గంటకు 160కిలోమీటర్ల వేగంతో దూసుకెళ్లే ఈ రైలులో అనేక అధునాతన వసతులు ఏర్పాటు చేశారు. దిల్లీ- గాజియాబాద్‌ రీజనల్‌ ర్యాపిడ్‌ ట్రాన్సిట్‌ సిస్టమ్‌ కారిడార్‌లో పరుగులు పెట్టే ఈ రైలు ప్రత్యేకతలను పరిశీలిద్దాం.

Namo Bharat Train : దేశంలో సరికొత్త హైస్పీడ్ రైలు సేవలు అందుబాటులోకి రానున్నాయి. 'రీజనల్ ర్యాపిడ్ ట్రాన్సిట్ సిస్టమ్' పేరుతో ప్రాంతీయ రైళ్లను కేంద్ర ప్రభుత్వం అందుబాటులోకి తీసుకురానుంది. ఈ రైళ్లకు 'నమో భారత్​'గా కేంద్ర ప్రభుత్వం నామకరణం చేసినట్లు తెలుస్తోంది. వందేభారత్ ఎక్స్​ప్రెస్ తర్వాత భారత్​లో పట్టాలెక్కుతున్న మరో హైస్పీడ్ రైలు ఇది. ఈ ప్రాజెక్టులో భాగంగా తొలి ప్రాంతీయ హైస్పీడ్ రైలును ప్రధానమంత్రి నరేంద్ర మోదీ శుక్రవారం (అక్టోబర్ 20న) ప్రారంభించనున్నారు. దిల్లీ నుంచి గాజియాబాద్​ మధ్య ఈ రైలు నడవనుంది. సాహిబాబాద్- దుహై డిపో మధ్య ఈ రైలు దూసుకెళ్లనుంది. గంటకు 160 కిలోమీటర్ల వేగంతో ప్రయాణించే ఈ రైలులో అధునాతన వసతులు ఏర్పాటు చేశారు.

నమో భారత్ రైళ్లు

కాగా, రీజనల్ ర్యాపిడ్ ట్రాన్సిట్ సిస్టమ్​లో భాగంగా దిల్లీ- గాజియాబాద్ - మేరఠ్ కారిడార్​ను ప్రధానమంత్రి నరేంద్ర మోదీ ప్రారంభించనున్నారు. దీంతో సాహిబాబాద్, దుహై డిపోల మధ్య 17 కిలోమీటర్ల పొడవైన కారిడార్ అందుబాటులోకి రానుంది. ఈ రెండు డిపోల మధ్య ఐదు స్టేషన్లు (సాహిబాబాద్‌, ఘజియాబాద్‌, గుల్దర్‌, దుహై, దుహై డిపో) ఏర్పాటు చేశారు. అక్టోబర్‌ 21 నుంచి ఈ రైళ్లు ప్రయాణికులకు సర్వీసులు అందిస్తాయి.

నమో భారత్ రైళ్లు

15 నిమిషాలకో రైలు..
నమో భారత్ రైళ్లు పూర్తిగా ఎయిర్ కండిషన్డ్. ఇరువైపులా 2x2 లేఅవుట్​లో సీట్లు, నిలబడేందుకు విశాలమైన ప్రదేశం, లగేజ్ ర్యాక్​లు ఉంటాయి. సీసీటీవీలు, ఎమర్జెన్సీ డోర్ ఓపెనింగ్ మెకానిజం, ఛార్జింగ్ పాయింట్లు వంటి అధునాతన సౌకర్యాలు కల్పించారు. ఈ రైళ్లు ఉదయం 6 నుంచి రాత్రి 11 వరకు నడుస్తాయి. ప్రతి 15 నిమిషాలకు ఒక రైలు చొప్పున సర్వీసులు అందిస్తాయి.

నమో భారత్ రైళ్లు

మహిళలకు రిజర్వు
ప్రతి ట్రైన్​లో ఆరు కోచ్‌లు ఉంటాయి. ఒకేసారి 1700 మంది కూర్చొని, నిలబడి ప్రయాణించే వీలు ఉంటుంది. స్టాండర్డ్‌ కోచ్‌లో 72 సీట్లు, ప్రీమియం కోచ్‌లో 62 సీట్లు చొప్పున ఉంటాయి. స్టాండర్డ్‌ కోచ్‌లలో కనీస టికెట్‌ ధర రూ.20 కాగా.. గరిష్ఠ ధర రూ.50గా నిర్ణయించారు. ప్రీమియం కోచ్‌లలో కనీస టికెట్‌ ధర రూ.40 కాగా.. గరిష్ఠ ధర రూ.100. ప్రతి ట్రైన్​లో ఒక కోచ్‌ను మహిళల కోసం రిజర్వు చేశారు. ప్రతి కోచ్‌లోనూ మహిళలు, ప్రత్యేక అవసరాలు కలిగినవారు, సీనియర్‌ సిటిజన్లకు సీట్లను రిజర్వు చేశారు.

నమో భారత్ రైలు

కాంగ్రెస్ విమర్శలు
అయితే, రైళ్లకు 'నమో భారత్' అని పేరు పెట్టడంపై మండిపడింది. స్వీయ వ్యామోహం విషయంలో మోదీకి హద్దు లేకుండా పోయిందని ధ్వజమెత్తింది. 'నమో స్టేడియం తర్వాత ఇప్పుడు 'నమో' రైళ్లు తీసుకొచ్చారు' అంటూ కాంగ్రెస్ ప్రధాన కార్యదర్శి జైరాం రమేశ్ మండిపడ్డారు. గుజరాత్​లోని మొటేరా స్టేడియానికి నరేంద్ర మోదీ అని పేరు పెట్టడాన్ని ప్రస్తావిస్తూ ఈ వ్యాఖ్యలు చేశారు. మరోవైపు, దేశం పేరునే మార్చేస్తే సరిపోతుంది కదా అని కాంగ్రెస్ నేత పవన్ ఖేడా ఎద్దేవా చేశారు. 'రైళ్ల పేరులో ఇంకా భారత్ అని పెట్టడం ఎందుకు? దేశం పేరునే నమోగా మార్చేస్తే సరిపోతుంది కదా?' అని ఖేడా ట్వీట్ చేశారు.

నమో భారత్ రైళ్లు