ప్రపంచవ్యాప్తంగా మామిడి పండుకు ఎంతో ఆదరణ ఉంది. అందుకే దీనిని అన్ని ఫలాలకు రారాజుగా అని పిలుస్తారు. మామిడిలో వివిధ రకాల ఉన్నాయి. అయితే మధ్యప్రదేశ్లోని జబల్పుర్లో సంకల్ప్, రాణి పరిహార్ దంపతులు పండించే మామిడి పండ్లు కేజీ సుమారు రూ. లక్ష నుంచి రూ. 2 లక్షల వరకు ధర పలుకుతాయి. జపాన్లో ఎక్కువగా పండించే 'టాయో నో టామ్గావ్' రకానికి చెందిన మామిడి పండ్లను ప్రస్తుతం పరిహార్ దంపతులు సాగు చేస్తున్నారు.
జబల్పుర్లోని చార్గ్వన్ రోడ్డు ప్రాంతంలో ఉన్న పరిహార్ దంపతుల గార్డెన్లో సుమారు 14 రకాల మామిడి పండ్లు దర్శనమిస్తాయి. ఈ సాగును వీరు గత నాలుగేళ్లగా చేస్తున్నారు. 'టాయో నో టామ్గావ్' రకానికి చెందిన ఈ చెట్లల్లో ఒక్కో చెట్టుకు 20 పండ్లు కాస్తాయని రాణి పరిహార్ తెలిపారు.
"ఈ సాగు చేయడానికి చాలా సవాళ్లను ఎదుర్కొవాల్సి వచ్చింది. తక్కువ దిగుబడి ఉండటం వల్ల మొదట దీని కొనుగోలుకు ఎవరూ మొగ్గు చూపేవారు కాదు. కానీ క్రమంగా దీనికి డిమాండ్ పెరిగింది. జపాన్లో ఈ పండ్లను బహిరంగ ప్రదేశాల్లో పండించరు. కానీ భారత్లో బహిరంగ ప్రదేశాల్లో సాగు చేసేందుకు కూడా వాతావరణం అనుకూలంగా ఉంది. వీటిలో ఎలాంటి పీచు పదార్థం ఉండటమే కాక పండు కూడా చాలా రుచిగా ఉంటుంది."
-రాణి పరిహార్
2కేజీల మామిడి పండు..
జపాన్లో పండించే వివిధ రకాల మామిడి పండ్లను పరిహార్ దంపతులు సాగు చేస్తున్నారు. వీటిలో కొన్ని మామిడి పండ్లు పర్పుల్, పింక్ రంగుల్లో పండుతాయి.
వీరి తోటలో ఉన్న మరో ఆకర్షణ 2కేజీ మ్యాంగో. ఈ రకం మామిడి పండ్లు బాగా పండితే రెండు కేజీల బరువు ఉంటాయి. వీటితో పాటు అల్ఫోన్సో, నూర్ జహాన్, మల్లికా, దశరా మామిడి పండ్లను కూడా పరిహార్ దంపతులు పండిస్తున్నారు.
'ప్రభుత్వం ప్రోత్సహిస్తే..'
తమ సాగు లాభసాటిగా ఉన్నా.. హార్టికల్చర్ శాఖ అధికారులు దీనిపై దృష్టి పెట్టట్లేదని సంకల్ప్ పరిహార్ అంటున్నారు. దీని ఫలితంగా ఈ ఉత్పత్తులు చిరు రైతులకు చేరట్లేదని అభిప్రాయపడ్డారు. ప్రభుత్వం ప్రోత్సహిస్తే ఈ ప్రాంతంలోని పేద రైతుల పరిస్థితి మారుతుందని సంకల్ప్ అభిప్రాయపడుతున్నారు.
ఇదీ చదవండి : ఆ మామిడి పండ్లు తినాలంటే ఆస్తులమ్ముకోవాలి!
