దేశీయ టెలికామ్ ఇండస్ట్రీ ఆధ్వర్యంలో జరగనున్న కీలక సమావేశంలో ప్రధాన మంత్రి నరేంద్ర మోదీ.. ప్రారంభోపన్యాసం చేయనున్నారు. మంగళవారం జరగనున్న ఇండియా మొబైల్ కాంగ్రెస్(ఐఎంసీ)లో ఆయన వర్చువల్గా పాల్గొంటారని సెల్యులార్ ఆపరేటర్స్ అసోసియేషన్ ఆఫ్ ఇండియా (సీఓఏఐ) తెలిపింది. సమాచార ప్రసార శాఖ మంత్రి రవిశంకర్ ప్రసాద్, సహాయ మంత్రి సంజయ్ ధోత్రే, టెలికామ్ సెక్రెటరీ అన్షు ప్రకాశ్ ఈ కార్యక్రమంలో పాల్గొననున్నారు.
కొవిడ్ దృష్ట్యా నాలుగో విడత జరుగనున్న ఐఎంసీని ఈసారి వర్చువల్గా నిర్వహిస్తున్నారు. రిలయన్స్ ఇండస్ట్రీస్ అధినేత ముకేశ్ అంబానీ, భారతీ ఎంటర్ ప్రైజెస్ ఛైర్మన్ సునీల్ భారతీ మిట్టల్, ఎరిక్సన్ అధిపతి నున్జియో మిర్టిల్లో ఈ కార్యక్రమానికి హాజరవనున్నారు. 30కి పైగా దేశాలు, 210 మంది ఉపన్యాసకులు, 150 మందికి పైగా ఎగ్జిబిటర్లు, 3 వేలకు పైగా సీఈఓ స్థాయి ప్రతినిధులు ఇందులో పాల్గొంటారు.
టెలికామ్ రంగంలో స్థానిక ఉత్పత్తలను ప్రోత్సహించడం, ప్రపంచ సహకారాన్ని మెరుగుపరుచుకోవడం, నూతన అవకాశాలను సృష్టించే లక్ష్యంతో ఐఎంసీ 2020 సమావేశం కొనసాగనుందని సీఓఏఐ తెలిపింది. దక్షిణాసియాలోనే ఇదే అతిపెద్ద టెక్ సమావేశమని పేర్కొంది. రిలయన్స్ జియో, భారతీ ఎయిర్టెల్, వోడాఫోన్ ఇండియా వంటి కంపెనీలు సీఓఏఐలో సభ్యులుగా ఉన్నాయి.
ఇదీ చూడండి:పాత చట్టాలతో నవ భారతాన్ని నిర్మించలేం: మోదీ
