ప్రజా సంక్షేమం కోసం బడ్జెట్లో ప్రభుత్వం తీసుకున్న చర్యలపై అవగాహన కల్పించేందుకు కేంద్ర మంత్రులు, భాజపా అగ్రనేతలు దేశవ్యాప్త పర్యటనలు చేపట్టనున్నారు. ఫిబ్రవరి 6, 7 తేదీల్లో తమకు కేటాయించిన నగరాల్లో నేతలు పర్యటించనున్నారు. బడ్జెట్పై వితిపక్షాల వాదనలు తిప్పికొట్టడంపై ఇప్పటికే ప్రణాళికలు రచిస్తున్నారు. విమర్శలకు ఏ విధంగా సమాధానం ఇవ్వాలన్న విషయంపై మంత్రులు, వారి ప్రతినిధులకు కేంద్ర ఆర్థిక మంత్రి నిర్మలా సీతారామన్ ఇదివరకే సూచనలు ఇచ్చారు.
ముంబయిలో జరిగే కార్యక్రమంలో నిర్మలా సీతారామన్ పాల్గొననుండగా.. నాగ్పుర్లో నితిన్ గడ్కరీ, జమ్ములో జితేంద్ర సింగ్ ప్రసంగించనున్నారు.
కేంద్ర వ్యవసాయ మంత్రి నరేంద్ర సింగ్ తోమర్ భోపాల్లో నిర్వహించే బహిరంగ సభకు హాజరవుతారు. అనంతరం మీడియాతో మాట్లాడతారు. గువాహటిలో సృతి ఇరానీ, గోవాలో గజేంద్ర షెకావత్, లఖ్నవూలో పీయూష్ గోయల్, హైదరాబాద్లో ధర్మేంద్ర ప్రధాన్, బెంగళూరులో ప్రహ్లద్ జోషి బడ్జెట్ అవగాహన సమావేశాల్లో పాల్గొననున్నారు.
ఎంపీలు, ఎమ్మెల్యేలు కూడా
భాజపా ప్రధాన కార్యదర్శులు దిలీప్ సైకియా, సీటీ రవి, భూపేంద్ర యాదవ్, తరుణ్ ఛుగ్ సైతం వివిధ సభల్లో పాల్గొననున్నారు. వీరితో పాటు భాజపా ఎంపీలు, ఎమ్మెల్యేలు, ఆఫీస్ బేరర్లు కూడా స్థానికంగా అవగాహన కల్పించనున్నారు.
ఇదీ చదవండి: గాజీపూర్ సరిహద్దులో మేకులు తొలగింపు.. కానీ!
