గోవాలో నూతన సంవత్సర వేడుకలు నిర్వహించాలనుకునే వారికి ఇబ్బందులు తప్పేలా లేవు! కొత్త రకం కరోనా వ్యాప్తి నేపథ్యంలో రాత్రిపూట కర్ఫ్యూ విధించే అవకాశముందని ఆ రాష్ట్ర వైద్య ఆరోగ్య శాఖ మంత్రి విశ్వజిత్ రాణే తెలిపారు. అయితే.. ఆ రాష్ట్ర ముఖ్యమంత్రి ప్రమోద్ సావంత్ మాత్రం దీనిపై ఇంకా ఎలాంటి నిర్ణయం తీసుకోలేదని చెప్పారు.
రాత్రి పూట కర్ఫ్యూ విధించే ఆలోచనపై సీఎంతో చర్చించినట్లు గురువారం ఉదయం విడుదల చేసిన ఓ ప్రకటనలో మంత్రి రాణే తెలిపారు. దీనిపై ముఖ్యమంత్రి ఆమోదం కోసం ఎదురు చూస్తున్నామని చెప్పారు. కొవిడ్ నిబంధనలపై కేంద్రం నుంచి వచ్చిన లేఖ అనంతరమే ఈ నిర్ణయంపై దృష్టి సారించామని ఆయన పేర్కొన్నారు. అయితే.. ఇప్పటికే నూతన సంవత్సర వేడుకుల కోసం పర్యటకులు భారీ సంఖ్యలో గోవాకు విచ్చేస్తున్నారు. అక్కడి బీచ్ల్లో ఆడిపాడుతూ సందడి చేస్తున్నారు.
గోవాలో వైరస్ నియంత్రణకు పటిష్ఠ చర్యలు చేపట్టాలని కేంద్రం కోరిందని ఆ రాష్ట్ర ఆరోగ్య శాఖకు చెందిన ఓ సీనియర్ అధికారి చెప్పారు. నూతన సంవత్సర వేడుకల సందర్భంగా ఎక్కువ మంది గుమిగూడకుండా చూడాలని లేఖలో కేంద్ర ఆరోగ్య శాఖ కార్యదర్శి రాజేష్ భూషణ్ సూచించారని అన్నారు. అయితే.. రాత్రిపూట కర్ఫ్యూ విధించడంపై ఇంకా ఏ నిర్ణయమూ తీసుకోలేదని ముఖ్యమంత్రి ప్రమోద్ సావంత్ చెప్పారు.
