Bakrid Special Biryani : బక్రీద్ రోజు కర్ణాటక ముఖ్యమంత్రి సిద్ధరామయ్య నివాసంలో ఆసక్తికర ఘటన జరిగింది. బక్రీద్ పర్వదినాన్ని పురస్కరించుకుని సిద్ధరామయ్యకు స్పెషల్ బిర్యానీ పంపారు మంత్రి జమీర్ అహ్మద్ ఖాన్. బిర్యానీ పార్సిల్ను ఆటోలో తీసుకువస్తుండగా పోలీసులు అడ్డుకుని వెనక్కి పంపారు. అనంతరం బెంజ్ కారులో తీసుకువస్తే.. రాజమర్యాదలు చేసి ముఖ్యమంత్రి నివాసంలోకి అనుమతించారు.
ఇదీ జరిగింది.. గురువారం బెంగళూరులో మైసూరు రోడ్డులోని ఈద్గా దర్గాలో బక్రీద్ వేడుకల్లో కర్ణాటక ముఖ్యమంత్రి సిద్ధరామయ్య పాల్గొన్నారు. ఆ తర్వాత ఎలాంటి కార్యక్రమాలు లేకపోవడం వల్ల.. శివానంద సర్కిల్ ఉన్న తన అధికారిక నివాసానికి వెళ్లారు. అయితే, బక్రీద్ పర్వదినాన్ని పురస్కరించుకుని.. సిద్ధరామయ్యకు సన్నిహితుడు, మంత్రి జమీర్ అహ్మద్.. స్పెషల్ బిర్యానీ తయారు చేయించారు. ఆ బిర్యానీని ప్యాకింగ్ చేసి ఆటోలో సిద్ధరామయ్య ఇంటికి పంపించారు. అయితే, ఆటోను అడ్డుకున్న భద్రతా సిబ్బంది.. సీఎం ఇంటిలోపలికి అనుమతించలేదు. చేసేదేం లేక ఆటో చామరాజ్పేటలోని మంత్రి జమీర్ ఇంటికి వెళ్లింది.
ఈ విషయం తెలుసుకున్న జమీర్.. సిద్ధరామయ్య నాన్వెజ్ ప్రియుడు కాబట్టి ఆయన కోసం స్పెషల్గా తయారుచేసిన బిర్యానీ వృథా కాకూడదని అనుకున్నారు. ఎలాగైనా బిర్యానీని ముఖ్యమంత్రికి అందించాలని నిర్ణయించుకున్నారు. అనంతరం ఉపాయం ఆలోచించి.. బెంజ్ కారులో బిర్యానీ పార్సిల్ను మళ్లీ ముఖ్యమంత్రి ఇంటికి పంపించారు. ఈసారి బెంజ్ కారును చూసిన పోలీసులు.. రాజమర్యాదలు చేసి లోపలికి అనుమతించారు. జమీర్ పట్టు పట్టి మరీ లంచ్ సమయంలోపే బక్రీద్ స్పెషల్ బిర్యానీని సిద్ధరామయ్యకు అందజేశారు. ఆ బిర్యానీతో లంచ్ ముగించారు ముఖ్యమంత్రి సిద్ధరామయ్య.
క్యాండిల్ వెలుగులో బడ్జెట్ చిదివిన సిద్ధరామయ్య..
ఇలాంటి ఓ ఘటనతో ఇటీవల వార్తల్లో నిలిచారు సిద్ధరామయ్య. కర్ణాటక విధానసభలో అశుభకరమైనదిగా భావించే దక్షిణ భాగంలో ఉన్న తలుపును చాలా ఏళ్ల తర్వాత తెరిపించారు. ఆ తలుపు నుంచే రాకపోకలు సాగించాలని నిర్ణయించారు. 'అన్న భాగ్య పథకం' గురించి సీనియర్ అధికారులతో తన కార్యాలయంలో సమావేశమైన సీఎం.. మూసి ఉన్న తలుపును గమనించి ఆరాతీశారు. ఆ ద్వారాన్ని అశుభకరమైనదిగా భావిస్తున్నారని.. అందుకే తెరవడం లేదని అధికారులు తెలిపారు. అనంతరం ఆ తలుపులు ముందు కొద్ది సేపు నిల్చున్న సిద్ధరామయ్య.. దాన్ని తెరవమని అధికారులను అదేశించారు.
అయితే అంతకుముందు కూడా ఇలాంటి ఘటనలు జరిగాయి. గతంలో ఆయన రాష్ట్ర ఆర్థిక మంత్రిగా ఉన్నప్పుడు.. శాసనసభలో అశుభ రాహు కాలంలో బడ్జెట్ ప్రవేశపెట్టారు. దీంతో అసెంబ్లీలో కరెంట్ పోయింది. సభ్యులందరూ కంగారు పడినా.. క్యాండిల్ వెలుగులో ఆయన బడ్జెట్ చదివారు. కరెంట్ వచ్చే వరకు అలాగే చదవడం కొనసాగించారు. పూర్తి కథనం కోసం ఈ లింక్పై క్లిక్ చేయండి.
