Mid air collision Indigo: రెండు ఇండిగో విమానాలు ఆకాశంలోకి ఎగిరిన కొద్ది సమయానికే అతి దగ్గరగా వచ్చాయి. అయితే, రాడార్ వ్యవస్థ హెచ్చరించటం వల్ల త్రుటిలో ప్రమాదం తప్పింది. బెంగళూరు విమానాశ్రయంలో ఈ సంఘటన జనవరి 9న జరిగినట్లు విమానాయన నియంత్రణ సంస్థ డీజీసీఏ బుధవారం తెలిపింది. కానీ, ఈ దీని గురించి లాగ్బుక్లో ఏమీ నమోదు చేయలేదని, ఎయిర్పోర్ట్స్ అథారిటీ ఆఫ్ ఇండియా(ఏఏఐ)కి నివేదించలేదని పేర్కొంది.
ఈ వ్యవహారంపై దర్యాప్తు జరుగుతోందని, తప్పు చేసినవారిపై కఠిన చర్యలు తీసుకుంటామని తెలిపారు డీజీసీఏ చీఫ్ అరుణ్ కుమార్. మరోవైపు.. ఈ సంఘటనపై ఇండిగో, ఏఏఐ స్పందించేందుకు నిరాకరించాయి.
ఇండిగో విమానాలు 6E455(బెంగళూరు నుంచి కోల్కతా),6E246( బెంగళూరు నుంచి భువనేశ్వర్) బెంగళూరు విమానాశ్రయం నుంచి బయలుదేరే క్రమంలో నిబంధనలను అతిక్రమించినట్లు డీజీసీఏ అధికారులు తెలిపారు. జనవరి 9న ఉదయం కేవలం 5 నిమిషాల తేడాతోనే బెంగళూరు విమానాశ్రయం నుంచి రెండు విమానాలు బయలుదేరాయన్నారు. 'విమానాశ్రయం నుంచి గాల్లోకి ఎగిరాక రెండు విమానాలు ఎదురెదురుగా వచ్చాయి. రాడార్ కంట్రోలర్ హెచ్చరికతో దూరంగా వెళ్లటం వల్ల ఆకాశంలో విమానాలు ఢీకొట్టే ప్రమాదం తప్పింది.' అని పేర్కొన్నారు.
ఇదీ చూడండి: అంతర్జాతీయ విమానాలపై నిషేధం పొడిగింపు
